प्रभात वृत्तसेवा
माळेगाव – शिवनगर विद्या प्रसारक मंडळाच्या माळेगाव येथील शैक्षणिक संकुलावर उपमुख्यमंत्री अजित पवार यांनी थेट व कठोर शब्दांत टीका करत गंभीर आरोपांचा भडिमार केला. मी खोलात जातोय आणि एकामागून एक प्रकार बाहेर येत आहेत. ही संस्था चालवली जातेय की लपवली जातेय? असा रोखठोक सवाल करत त्यांनी अनागोंदी कारभाराचा पर्दाफाश केला.

पवार म्हणाले, संस्थेला सध्या तब्बल 11 ते 12 कोटी रुपयांचा तोटा झाला असून, शिक्षक व कर्मचार्‍यांचे पगार वेळेवर दिले जात नाहीत. नॉन-टीचिंग स्टाफ एवढा वाढवला आहे की काहींना कामच नसल्याची परिस्थिती आहे. शिक्षण नाही, जबाबदारी नाही – फक्त वशिल्याने भरती. ‘आओ जाओ घर तुम्हारा’ अशी अवस्था आहे, असा उपरोधिक टोला त्यांनी लगावला.

पुणे जिल्हा मध्यवर्ती बँकेतून घेतलेले 11 कोटी रुपयांचे कर्ज आजतागायत फेडले गेलेले नाही. त्यातच चालू वर्षात साडेतीन ते चार कोटी रुपयांचा तोटा झाल्याचे त्यांनी उघड केले. हे कर्ज कोण फेडणार? याची जबाबदारी कोण घेणार? असा थेट सवाल त्यांनी केला. या आर्थिक गोंधळावर सध्या ऑडिट सुरू असून, एका व्यक्तीवर 25 ते 30 लाख रुपयांच्या फसवणुकीचा गुन्हा दाखल झाल्याची माहितीही त्यांनी दिली. तीन-चार वर्षांचा फ्रॉड आहे, अजून काय काय बाहेर येणार हे तपासानंतरच कळेल, असे पवार म्हणाले.

शैक्षणिक शिस्त, कर्मचारी कार्यपद्धती आणि मेस व्यवस्थेवरही त्यांनी ताशेरे ओढले. एमबीए, बी. फार्मसी, डी. फार्मसीसाठी डिमांड आहे; पण शिस्त नाही. लोक सह्या करतात आणि बाहेर फिरतात. कामाच्या वेळेत इतर व्यवसायात गुंतलेले आहेत. संध्याकाळी परत येतात. कोणाचं प्रेशर नाही, कोणाचं उत्तरदायित्व नाही, असा आरोप त्यांनी केला.

मेस व्यवस्थेबाबत बोलताना पवार म्हणाले, मुली मेसमध्ये जाणं टाळतात. इतकी खराब व्यवस्था आहे की विद्यार्थ्यांना तिथे जेवायला जाणं नकोसं वाटतं. स्टाफमध्ये आपलेपणाची भावना नाही. ही संस्था चालवली जातेय की विसरली गेलीय? असा सवाल त्यांनी उपस्थित केला. यावेळी त्यांनी स्पष्ट इशारा दिला की पुढच्या भेटीत संपूर्ण स्टाफची बैठक घेणार आहेत.

मी बारामतीत चांगलं काम करतोय, पण इथे काय चाललंय? शरद पवार साहेब अध्यक्ष आहेत, त्यांना हे माहिती आहे का? असा थेट प्रश्नही त्यांनी केला.माळेगाव कारखान्याच्या 27 तारखेला होणार्‍या सभेत अजित पवार यांचा पुढचा गौप्यस्फोट काय असेल, याकडे आता सर्व सभासदांचे लक्ष लागले आहे.