Rohit Pawar : बारामतीमधील पिंपळी येथील मतदान केंद्रावर मतदानाचा हक्क बजावल्यानंतर आमदार रोहित पवार यांनी १० आणि ११ फेब्रुवारीला पत्रकार परिषद घेणार असल्याचे जाहीर केले. दोन तारखा देत दोन वेगवेगळ्या कारणांसाठी पत्रकार परिषद असल्याचे त्यांनी स्पष्ट केले होते. त्यानुसार आज १० फेब्रुवारी असल्याने रोहित पवार पत्रकार परिषदेत काय गौप्यस्फोट करणार का? हे पाहणे महत्वाचे असणार आहे. जिल्हा परिषदेच्या निवडणुकीत मतदानाचा हक्क बजावल्यानंतर रोहित पवारांनी माध्यमांशी संवाद साधला. ‘दादांच शेवटचं स्वप्न पूर्ण होईल आणि जिल्हा परिषदेत जास्तीत जास्त सदस्य निवडून येतील,’ असा विश्वास रोहित पवार यांनी व्यक्त केला होता. त्यानुसार १२ जिल्हा परिषदपैकी पुणे जिल्हा परिषद निवडणुकीत एकूण ७३ जागांपैकी राष्ट्रवादी काँग्रेस पक्षाने तब्बल ४८ जागांवर मजल मारली आहे. भाजप १०, शिवसेना ४ जागांवर समाधान मानावे लागले आहे. त्यामुळे रोहित पवारांनी जो विश्वास व्यक्त केला होता सार्थ होताना दिसत आहे. अजित पवारांच्या विमान अपघाताबाबत रोहित पवार गौप्यस्फोट करणार? अजित पवार यांचे विमान अपघातात निधन झाल्यानंतर अनेक प्रश्न उपस्थित केले जात आहेत. यासोबतच दोन्ही राष्ट्रवादीच्या विलिनीकरणाबाबत देखील जोरदार चर्चा राजकीय वर्तुळात होत आहे. यासंदर्भातच १० फेब्रुवारी आणि १२ फेब्रुवारी अशा दोन पत्रकार परिषदा रोहित पवारांच्या होणार आहेत. १० फेब्रुवारीला होणारी पत्रकार परिषद ही अजितदादांच्या विमान अपघातातबाबत घेणार असून, माझ्या मनामध्ये ज्या शंका आहेत, त्यावर बोलणार असल्याचे रोहित पवारांनी स्पष्ट केले. तसेच १२ फेब्रुवारीला दुसरी पत्रकार परिषद घेणार असून या पत्रकार परिषेदत दोन्ही राष्ट्रवादीच्या विलिनीकरणाबाबत बोलणार असल्याचे त्यांनी सांगितले. रोहित पवार गौप्यस्फोट करणार? दादांची इच्छा नेमकी काय होती, विलिनीकरणासाठी १२ तारीखच का? विलिनीकरण का आणि कशासाठी होणार होते? यावर सविस्तर बोलणार असल्याचे रोहित पवार यांनी सांगितले. त्यामुळे रोहित पवार आजच्या पत्रकार परिषदेतून कोणते गौप्यस्फोट करणार? हे पाहणे महत्वाचे असणार आहे. शरद पवार रुग्णालयात दाखल Sharad Pawar: अजित पवार यांच्या निधनानंतर पवार कुटुंब मोठ्या धक्क्यातून सावरत आहे. कुटुंबातील वडीलधारे म्हणून शरद पवार यांच्याकडे पाहिले जाते. या दुःखद प्रसंगी तेच एकमेव आधार पवार कुटुंबासाठी आहेत. पण अचानक शरद पवारांना बारामतीमधून पुण्यातील रुबी हॅाल रुग्णालयात दाखल करण्यात आले. याचे कारण म्हणजे त्यांना छातीत वेदना होत असून, कफ झाला आहे. त्यांना रुग्णालयातील खाजगी रुममध्ये ठेवण्यात आल्याचे डॅाक्टारांनी सांगितले असून, त्यांची प्रकृती आता स्थिर असल्याचे डॅाक्टरांना स्पष्ट केले आहे. हेही वाचा : Devendra Fadnavis meets Amit Shah : मुख्यमंत्री फडणवीस अचानक दिल्ली दौऱ्यावर; राष्ट्रवादी काँग्रेसच्या विलीनिकरणावर चर्चा?
