Air India flight hijack : एअर इंडियाच्या कोलकाता-मुंबई विमानाला हायजॅकची धमकी.! टॉयलेटमध्ये चिठ्ठी सापडली अन् नंतर काय घडलं पाहा…
पायलटकडून 'हायजॅक' असा संदेश पाठवण्यात आल्यानंतर विमानतळ प्रशासन आणि सुरक्षा यंत्रणांमध्ये एकच धावपळ उडाली.
Air India flight hijack : विमान हवेत असताना हायजॅक झाल्याची बातमी समोर आली तर प्रवाशांची काय अवस्था होईल, याची कल्पनाही करवत नाही. असाच काहीसा थरारक प्रकार कोलकात्यातील नेताजी सुभाषचंद्र बोस आंतरराष्ट्रीय विमानतळावर समोर आला. एअर इंडियाच्या मुंबईला जाणाऱ्या विमानाबाबत हायजॅकचा अलर्ट मिळताच विमानतळावर एकच खळबळ उडाली.
पायलटकडून ‘हायजॅक’चा संदेश पाठवण्यात आल्याने सुरक्षा यंत्रणा तातडीने सतर्क झाल्या. त्यानंतर संबंधित विमानाला आयसोलेशन बे मध्ये हलवून केंद्रीय औद्योगिक सुरक्षा दलासह (CISF) विमानतळावरील विशेष सुरक्षा पथकांनी तपासणी सुरू केली. सुदैवाने प्राथमिक तपासणीत कोणतीही संशयास्पद वस्तू आढळून आली नसल्याची माहिती समोर आली आहे.
Air India flight hijack
विमानात हायजॅकचा अलर्ट, सुरक्षा यंत्रणांची तातडीने धावपळ
मिळालेल्या माहितीनुसार, एअर इंडियाच्या मुंबईकडे जाणाऱ्या AI 772 / AI 2772 या विमानाबाबत हायजॅकचा अलर्ट मिळाला. पायलटकडून ‘हायजॅक’ असा संदेश पाठवण्यात आल्यानंतर विमानतळ प्रशासन आणि सुरक्षा यंत्रणांमध्ये एकच धावपळ उडाली. परिस्थितीचे गांभीर्य लक्षात घेऊन विमानाला तातडीने आयसोलेशन बे मध्ये नेण्यात आले.
यानंतर CISF आणि विमानतळाच्या विशेष सुरक्षा अधिकाऱ्यांनी विमानाची कसून तपासणी सुरू केली. विमानातील प्रत्येक भाग, प्रवाशांचे सामान आणि संशयास्पद वस्तूंची बारकाईने पाहणी करण्यात आली. कोणताही संभाव्य धोका टाळण्यासाठी संपूर्ण सुरक्षा प्रोटोकॉलनुसार कारवाई करण्यात आली.
या घटनेमागे विमानाच्या शौचालयात लिहिलेला धमकीचा संदेश असल्याची माहिती समोर आली आहे. हा संदेश नेमका कोणी लिहिला? त्यामागे कोणाचा हात आहे? हा केवळ खोडसाळपणा होता की विमानाच्या सुरक्षेला धोका निर्माण करण्याचा प्रयत्न होता? असे अनेक प्रश्न उपस्थित झाले आहेत.
या प्रकरणाची पोलिसांसह संबंधित सुरक्षा यंत्रणांनी स्वतंत्रपणे चौकशी सुरू केली आहे. विमानातील प्रवाशांची यादी तपासली जात असून विमानतळ परिसरातील तसेच विमानातील सीसीटीव्ही फुटेजचीही पाहणी केली जात आहे. संदेश लिहिणाऱ्या व्यक्तीचा शोध घेण्यासाठी तपास यंत्रणा प्रयत्नशील आहेत.
हायजॅकचा अलर्ट मिळाल्यानंतर सुरक्षा यंत्रणांनी कोणतीही जोखीम न घेता विमानाची सखोल तपासणी केली. आतापर्यंतच्या प्राथमिक तपासणीत मोठा धोका निर्माण करणारी किंवा संशयास्पद वस्तू आढळून आलेली नाही. मात्र, धमकीच्या संदेशामागील नेमकं कारण आणि संबंधित व्यक्तीचा शोध घेण्यासाठी तपास सुरू आहे.
