नवी दिल्ली : नागरी विमान वाहतूक महासंचालनालयाने (डीजीसीए) एअर इंडियाला एक गंभीर इशारा दिला आहे की, जर उड्डाण ऑपरेशन्समध्ये अनियमितता सुरू राहिल्‍यास एअरलाइनचा परवाना निलंबित केला जाऊ शकतो किंवा तो रद्दही केला जाऊ शकतो. अधिक माहितीनुसार, पायलट ड्युटी शेड्यूलिंग आणि देखरेखीमध्ये सतत आणि गंभीर उल्लंघनांमुळे हे पाऊल उचलण्यात आले आहे.

शनिवारी, डीजीसीएच्या आदेशानुसार, एअर इंडियाने ३ अधिकाऱ्यांना काढून टाकण्‍याचे आदेश दिले होते. यामध्ये विभागीय उपाध्यक्ष चुडा सिंग, क्रू शेड्युलिंग हाताळणारी मुख्य व्यवस्थापक पिंकी मित्तल आणि क्रू शेड्युलिंगच्या नियोजनाशी संबंधित पायल अरोरा यांचा समावेश आहे. विमान वाहतूक सुरक्षा नियमांचे गंभीर उल्लंघन केल्याबद्दल तिन्ही अधिकाऱ्यांवर ठपका ठेवण्‍यात आला आहे.

डीजीसीएने एअर इंडियाला त्यांना तात्काळ प्रभावाने क्रू शेड्यूलिंग आणि रोस्टरिंगशी संबंधित भूमिकांमधून काढून टाकण्याचे आदेश दिले. १२ जून रोजी अहमदाबादमध्ये झालेल्या विमान अपघाताच्या घटनेनंतर हा निर्णय घेण्यात आला. लंडनला जाणारे एअर इंडियाचे विमान एआय-१७१ उड्डाणानंतर लगेचच कोसळले. विमान मेडिकल कॉलेजच्या वसतिगृहाला धडकले, ज्यामध्ये प्रवाशांसह एकूण २७५ लोकांचा मृत्यू झाला होता.