नवी दिल्ली: बुधवारी एअर इंडियाचे (Air India) सर्व्हर देशभरातील अनेक विमानतळांवर ठप्प झाल्याने प्रवाशांना प्रचंड मनस्ताप सहन करावा लागला. राजधानी दिल्लीच्या इंदिरा गांधी आंतरराष्ट्रीय विमानतळावर (IGI) प्रवाशांच्या लांबच लांब रांगा लागल्याचे चित्र पाहायला मिळाले.

विमानतळावरील अधिकाऱ्यांनी या समस्येची पुष्टी केली आहे की, एअर इंडियाचे सर्व्हर देशातील सर्वच विमानतळांवर डाऊन झाले आहेत. दिल्लीतील टर्मिनल-२ (Terminal-2) वर दुपारी ३ वाजल्यापासून सर्व्हरमध्ये बिघाड झाल्याने सामानाचे ‘ड्रॉप’ (Baggage Drop) करण्यासाठी प्रवाशांना अडचणी येत होत्या. सॉफ्टवेअरमधील तांत्रिक बिघाडामुळे अखेर मॅन्युअल चेक-इन प्रक्रिया सुरू करावी लागली.

मॅन्युअल चेक-इनमुळे प्रक्रिया खूपच हळू झाली, परिणामी विमानतळावर प्रवाशांची मोठी गर्दी जमा झाली. काही प्रवाशांनी एअर इंडियाच्या सर्व्हरमध्ये कालपासूनच अडचण येत असल्याचा दावा केला. एका महिला प्रवाशाची सर्व्हर समस्येमुळे कनेक्टिंग फ्लाईट चुकल्याने तिला पुन्हा तिकीट बुक करावे लागले.

सर्वात धक्कादायक बाब म्हणजे, सर्व्हर डाऊन होऊनही एअरलाइन कंपनीकडून प्रवाशांना कोणतीही अधिकृत सूचना (मेसेज/ईमेल) देण्यात आली नाही. विमानतळावर अनेक विमानांच्या वेळेत अचानक बदल करण्यात आला.

दरम्यान, हवाई वाहतुकीच्या गर्दीमुळे इतर एअरलाइनच्या विमानांवरही परिणाम झाला आहे. इंडिगो (Indigo) एअरलाइनने ‘ऍडव्हायझरी’ (Advisory) जारी करून, दिल्लीतून उड्डाण कार्यावर परिणाम होऊ शकतो आणि प्रवाशांना विलंब तसेच प्रतीक्षा वेळेत वाढ अनुभवावी लागू शकते, असा इशारा दिला आहे. प्रवाशांना रिअल-टाईम अपडेट तपासण्याचे आवाहन करण्यात आले आहे.