Ahmedabad Air India Plane Crash : अहमदाबाद विमानतळाजवळ घडलेल्या एअर इंडिया बोईंग 787 ड्रीमलायनर (एआय-171) अपघाताने संपूर्ण देश हादरला आहे. या दुर्घटनेत 265 हून अधिक जणांचा मृत्यू झाला, तर अनेक जण जखमी झाले आहेत. या अपघाताचा थरारक व्हिडीओ एका तरुणाने कॅमेऱ्यात टिपला, ज्याने जगभरात या घटनेचे गांभीर्य अधोरेखित केले. हा व्हिडीओ काढणारा आर्यन नावाचा तरुण पहिल्यांदाच विमान पाहत होता, आणि त्याने काढलेला व्हिडीओ आता मोठ्या प्रमाणात व्हायरल झाला आहे. ‘आर्यन असारी’ पोलिसांच्या ताब्यात : आता, एकीकडे आर्यनच्या घराबाहेर माध्यम प्रतिनिधींनी बाईटसाठी रांगा लावल्यानेही आर्यन त्रस्त झाला आहे. तर दुसरीकडे आर्यनची पोलिसांकडून चौकशी केली जात आहे. आर्यन असारीला पोलिसांनी चौकशीसाठी ताब्यात घेतलं असून अहमदाबाद गुन्हे शाखेकडून त्याची चौकशी केली जात आहे. आर्यनसह ज्या घरावरुन त्याने हा व्हिडिओ शूट केला, त्या घरमालकासही पोलिसांनी ताब्यात घेतलं आहे. आर्यन हा त्याच्या वडिलांसोबत साक्षीदार म्हणून जबाब देण्यासाठी आला होता. त्यानंतर त्याला त्याच्या वडिलांसोबत पाठवण्यात आले. दरम्यान याप्रकरणी, अद्याप कोणालाही अटक किंवा ताब्यात घेण्यात आलेले नाही, अशी माहितीही पोलिसांनी दिली आहे. मी कधीच विमान पाहिले नव्हते..! दरम्यान, एका मराठी वृत्तवाहिनीशी बोलताना आर्यन म्हणाला, “मी गावात राहतो आणि कधीच विमान पाहिले नव्हते. अहमदाबादला आलो असताना एका इमारतीच्या टेरेसवरून विमान उडताना दिसले. उत्साहाने मी मोबाइलमध्ये व्हिडीओ काढायला सुरुवात केली. पण काही क्षणांतच विमान खाली कोसळले, आणि मी घाबरलो. नेमके काय झाले, हे समजायच्या आतच हा प्रकार घडला.” आर्यनच्या या व्हिडीओने अपघाताचे भीषण दृश्य जगासमोर आणले. अपघाताच्या कारणांचा शोध सुरु : – सहा यंत्रणांचा तपास: DGCA, NSG, NIA, गुजरात ATS यासह सहा यंत्रणा अपघाताच्या कारणांचा शोध घेत आहेत. NIA ने घातपाताची शक्यता फेटाळली आहे. – ब्लॅक बॉक्स आणि DVDR डेटाचे फॉरेन्सिक विश्लेषण सुरू आहे. – केंद्रीय गृहसचिवांची समिती: घटनास्थळाची लवकरच पाहणी करणार असून, भविष्यातील धोके टाळण्यासाठी उपाययोजना सुचवणार. – यासोबतच NSG ची पथके सध्या घटनास्थळी तपास करत आहेत.
