AIFF Complaint AFC : भारतीय कर्णधाराविरोधात पॅलेस्टिनी खेळाडूचा संतापजनक वर्णद्वेषी इशारा! एआयएफएफने उचलले मोठे पाऊल
AIFF Complaint AFC : भारत आणि पॅलेस्टाईन यांच्यातील एएफसी १७ वर्षांखालील आशियाई कप पात्रता सामन्यादरम्यान झालेल्या वंशद्वेषी हावभावासंदर्भात एआयएफएफने एएफसीकडे तक्रार दाखल केली आहे.

IND vs PAL U17 Football AIFF Complaint AFC Racist Gesture : एएफसी अंडर-१७ आशियाई चषक २०२७ पात्रता फेरीतील भारत आणि पॅलेस्टाईन यांच्यातील सामन्यादरम्यान एक अत्यंत संतापजनक आणि धक्कादायक घटना घडली आहे. १७ नोव्हेंबर २०२६ रोजी क्वालालंपूर फुटबॉल स्टेडियमवर खेळल्या गेलेल्या या चुरशीच्या लढतीत पॅलेस्टाईनच्या एका खेळाडूने भारतीय अंडर-१७ पुरुष संघाचा कर्णधार दलालमुओन गंगटे याच्याविरोधात कथित वर्णद्वेषी इशारा केल्याने मोठा वाद निर्माण झाला असून, अखिल भारतीय फुटबॉल महासंघाने (AIFF) याप्रकरणी आशियाई फुटबॉल महासंघाकडे (AFC) अधिकृत तक्रार दाखल केली आहे.
एआयएफएफकडून सामन्याचे सीसीटीव्ही फुटेज तपासण्याची आणि कठोर कारवाईची मागणी –
अखिल भारतीय फुटबॉल महासंघाने आपल्या औपचारिक तक्रारीत आशियाई फुटबॉल महासंघाकडे (AFC) या गंभीर घटनेची तातडीने सखोल समीक्षा करण्याची मागणी केली आहे. सामन्याचे उपलब्ध सर्व सीसीटीव्ही आणि व्हिडिओ फुटेज काटेकोरपणे तपासून संबंधित दोषी खेळाडूवर लागू असलेल्या नियमांनुसार कठोर शिस्तभंगाची कारवाई करण्यात यावी, असा ठाम आग्रह एआयएफएफने आपल्या पत्रातून धरला आहे.
खेळात वर्णद्वेष किंवा भेदभावाला अजिबात थारा नाही; एआयएफएफची कठोर भूमिका
Seriously?????? 😡😡😡
Palestine’s No. 19 allegedly makes a racist gesture towards India U17 captain Gangte, yet the referee chooses to look the other way.
The AFC cannot let this slide. An immediate investigation and strict action are needed!!!! https://t.co/9OgGqss2qc
— The Khel India (@TheKhelIndia) November 17, 2026
कोणत्याही प्रकारचा वर्णद्वेष किंवा भेदभावपूर्ण वर्तन अत्यंत गंभीर असल्याचे अखिल भारतीय फुटबॉल महासंघाने स्पष्ट केले आहे. असे आचरण फुटबॉलच्या सन्मान, समानता, निष्पक्ष खेळ आणि खिलाडूवृत्ती या मूलभूत मूल्यांच्या पूर्णपणे विरोधात असून, मैदानावर अशा प्रकारची वागणूक कधीही स्वीकारली किंवा सहन केली जाणार नाही, असा कडक इशाराही महासंघाने दिला आहे.
मुसळधार पावसाच्या व्यत्ययानंतरही भारतीय युवा खेळाडूंची मैदानात दमदार सुरुवात
The All India Football Federation has lodged a complaint with the Asian Football Confederation over an alleged racist gesture during the India-Palestine match in Kuala Lumpur, Malaysia, in the AFC U17 Asian Cup Qualifiers. https://t.co/syeUgyYasX
— Indian Football (@IndianFootball) November 18, 2026
मैदानावरील या तणावपूर्ण वातावरणातही भारतीय युवा खेळाडूंनी आपला संयम ढळू दिला नाही. सातव्याच मिनिटाला कंबुहाओने शानदार गोल करत भारताला सुरुवातीची आघाडी मिळवून दिली; मात्र पहिल्या सत्राच्या भरपाई वेळेत यझान खलीफाने पेनल्टीचे गोलमध्ये रूपांतर करत पॅलेस्टाईनला १-१ अशी बरोबरी साधून दिली, ज्यानंतर मुसळधार पावसामुळे सामना काही काळ थांबवावा लागला.
कर्णधार गंगटेच्या गोलसह भारताचा पॅलेस्टाईनवर ४-१ असा दणदणीत विजय –
दुसऱ्या सत्रात भारतीय खेळाडूंनी आक्रमक पवित्रा घेत पॅलेस्टाईनला मैदानावर चोख प्रत्युत्तर दिले. ५१ व्या मिनिटाला मुकुंदोने, सात मिनिटांनंतर स्वतः कर्णधार दलालमुओन गंगटेने, तर ८८ व्या मिनिटाला झोरमदिनथाराने चौथा गोल करत भारताचा ४-१ असा दणदणीत विजय निश्चित केला.





