Sugarcane Price : अहिल्यानगर जिल्ह्यातील ऊसदराचा प्रश्न अद्याप सुटलेला नाही. पालकमंत्री राधाकृष्ण विखे पाटील यांच्या अध्यक्षतेखाली झालेली दुसरी बैठकही कोणत्याही ठोस निर्णयाविना संपली. मात्र, उद्या सायंकाळपर्यंत ऊसदर निश्चित करण्याचे निर्देश विखे यांनी साखर कारखान्यांच्या चेअरमनना दिले आहेत. त्यामुळे ऊस उत्पादक शेतकऱ्यांचे लक्ष आता उद्याच्या निर्णयाकडे लागले आहे. (Sugarcane Price)

कारखानदारांशी चर्चा करून दर निश्चित करणार

साखर कारखाने आर्थिक अडचणीत असल्याचे सांगत जिल्हा बँकेच्या नवनिर्वाचित पदाधिकाऱ्यांशी चर्चा करून ऊसदर निश्चित केला जाईल, अशी माहिती राधाकृष्ण विखे पाटील यांनी दिली. मात्र, बैठकीला मोजकेच दोन ते तीन साखर कारखान्यांचे चेअरमन उपस्थित असल्याने दराबाबतचा निर्णय होऊ शकला नाही. (Sugarcane Price)

बैठकीत तोडगा न निघाल्याने ऊस उत्पादक शेतकरी संघटना आक्रमक झाल्या. जिल्हाधिकारी कार्यालय परिसरात शेतकऱ्यांनी जोरदार घोषणाबाजी केली. उद्या सायंकाळपर्यंत ऊसदराचा निर्णय न झाल्यास उसाचे काटे, साखर कारखाने आणि जिल्ह्यातील प्रमुख महामार्ग बंद पाडण्याचा इशारा आंदोलक शेतकऱ्यांनी दिला आहे. (Sugarcane Price)

शेतकऱ्यांची नेमकी मागणी काय?

अहिल्यानगर जिल्ह्यात गाळप हंगाम सुरू होऊन जवळपास एक महिना उलटला असतानाही बहुतांश साखर कारखान्यांनी ऊसदर जाहीर केलेला नाही. त्यामुळे उसाला प्रतिटन ४ हजार रुपये पहिली उचल मिळावी, अशी शेतकऱ्यांची प्रमुख मागणी आहे. (Sugarcane Price)

या मागणीसाठी दोन दिवसांपूर्वी शेतकऱ्यांनी नगर-मनमाड राष्ट्रीय महामार्गावर दिवसभर रास्ता रोको आंदोलन केले होते. कारखाने आणि प्रशासनाने प्रतिटन ४ हजार रुपये पहिली उचल जाहीर न केल्यास आंदोलन अधिक तीव्र करण्याचा इशाराही देण्यात आला होता.  (Sugarcane Price)

आता दुसरी बैठकही निष्फळ ठरल्याने ऊसदराचा प्रश्न आणखी चिघळण्याची शक्यता आहे. उद्या सायंकाळपर्यंत कारखानदार दर जाहीर करतात का आणि शेतकऱ्यांच्या मागणीवर काय तोडगा निघतो, याकडे संपूर्ण जिल्ह्याचे लक्ष लागले आहे. (Sugarcane Price)