Saiyaara Casting: सध्या बॉक्स ऑफिसवर गाजत असलेल्या ‘सैयारा’ या चित्रपटातील प्रमुख कलाकार अहान पांडे आणि अनीत पड्डा ही दिग्दर्शकाची पहिली पसंती नव्हती, हे नुकतंच उघड झालं आहे. दिग्दर्शक मोहित सूरी यांनी एका मुलाखतीत याचा खुलासा केला आहे.

सिद्धार्थ-कियारा होती पहिली पसंती

माहितीनुसार, चित्रपटात प्रमुख भूमिकांसाठी सर्वप्रथम सिद्धार्थ मल्होत्रा आणि कियारा आडवाणी यांच्याशी संपर्क साधण्यात आला होता. ‘शेरशाह’मधील त्यांच्या केमिस्ट्रीने प्रभावित होऊन ‘सैयारा’च्या निर्मात्यांना ही जोडी कास्ट करायची होती. मात्र, काही कारणास्तव हे शक्य झालं नाही.

यानंतर, निर्माता आदित्य चोप्रा यांनी अहान पांडे आणि अनीत पड्डा यांची शिफारस मोहित सूरी यांच्याकडे केली आणि अखेर ही नवोदित जोडी फायनल करण्यात आली.

नव्या चेहऱ्यांवर घेतला धाडसी निर्णय

मोहित सूरी यांनी सांगितलं की, “मी सुरुवातीला प्रसिद्ध कलाकारांनाच घेण्याचा विचार केला होता. मात्र आदित्य चोप्रा यांनी मला स्पष्ट सांगितलं की ही कथा नव्या पिढीबद्दल आहे, त्यामुळे नव्या चेहऱ्यांची गरज आहे. मी विचारलं, ‘इतक्या मोठ्या बजेटवर कोण रिस्क घेईल?’ तेव्हा आदित्य म्हणाले ‘मी घेईन.’”

हा निर्णय योग्य ठरला, कारण प्रेक्षकांनी अहान आणि अनीत यांच्या अभिनयाला भरभरून प्रतिसाद दिला आहे.

बॉक्स ऑफिसवर ‘सैयारा’चा जलवा

18 जुलै रोजी प्रदर्शित झालेल्या या चित्रपटाने पहिल्याच दिवशी 21.5 कोटी रुपयांची कमाई केली. पहिल्या आठवड्यात एकूण 172 कोटी रुपयांचा गल्ला जमा केला असून, आतापर्यंत चित्रपटाने 247 कोटींचा टप्पा पार केला आहे. लवकरच हा चित्रपट 250 कोटींवर पोहोचण्याची शक्यता असून, अजून काही आठवडे तो थिएटरमध्ये चालण्याची अपेक्षा आहे. त्यामुळे लवकरच प्रदर्शित होणाऱ्या चित्रपटांना याचा फटका बसू शकतो.