Lalit Prabhakar : २६/११ च्या मुंबई दहशतवादी हल्ल्याने संपूर्ण देश हादरला होता. या भीषण हल्ल्यात अनेक निष्पाप नागरिकांसह सुरक्षा दलातील जवानांचा मृत्यू झाला. या घटनेवर आधारित आतापर्यंत अनेक चित्रपट प्रेक्षकांच्या भेटीला आले आहेत.

मात्र, दहशतवादी अजमल कसाबला अटक केल्यानंतर न्यायालयात झालेली संपूर्ण कायदेशीर प्रक्रिया आणि त्यामागची लढाई फारशा तपशीलाने रुपेरी पडद्यावर मांडण्यात आलेली नाही.

हीच बाजू आता ‘प्रहार: द अनटोल्ड स्टोरी ऑफ उज्ज्वल निकम’ या चित्रपटातून प्रेक्षकांसमोर येणार आहे. नुकताच या चित्रपटाचा अंगावर काटा आणणारा ट्रेलर प्रदर्शित झाला असून, त्याला प्रेक्षकांकडून उत्स्फूर्त प्रतिसाद मिळत आहे.

विशेष म्हणजे मराठमोळा अभिनेता ललित प्रभाकर या चित्रपटात अजमल कसाबची भूमिका साकारताना दिसणार आहे. ट्रेलरमधील त्याच्या लूक आणि अभिनयाची झलक सध्या चर्चेचा विषय ठरत आहे.

ट्रेलर लॉन्च सोहळ्यात ललित प्रभाकरने चित्रपटाबाबत मनोगत व्यक्त केले. “ही गोष्ट सगळ्यांपर्यंत पोहोचणं खूप महत्त्वाचं होतं. लोकांना हेही कळणं गरजेचं होतं की आपली न्यायव्यवस्था काय आहे. मला वाटतं, हा सिनेमा पाहिल्यानंतर एखाद्या दहशतवाद्याचंही मतपरिवर्तन झालं, तरी ती माझ्यासाठी खूप मोठी गोष्ट असेल.” असं ललित म्हणाला.

पुढे तो म्हणाला, “हे मी का म्हणतोय, हे तुम्हाला सिनेमा पाहिल्यानंतर कळेल.” तसेच चित्रपटात काम करण्याची संधी दिल्याबद्दल त्याने निर्माते-दिग्दर्शकांचे आभार मानले. या ट्रेलर लॉन्च सोहळ्याला मुख्यमंत्री देवेंद्र फडणवीस आणि ज्येष्ठ वकील उज्ज्वल निकम यांचीही विशेष उपस्थिती होती.

‘प्रहार: द अनटोल्ड स्टोरी ऑफ उज्ज्वल निकम’ हा चित्रपट २६/११ मुंबई दहशतवादी हल्ल्यानंतर अजमल कसाबविरुद्ध झालेल्या ऐतिहासिक न्यायालयीन लढाईवर आधारित आहे. शस्त्रांच्या माध्यमातून नव्हे, तर पुरावे, कायदा आणि सत्याच्या आधारावर न्याय मिळवण्यासाठी झालेला संघर्ष या चित्रपटातून मांडण्यात आला आहे.

चित्रपटात राजकुमार राव उज्ज्वल निकम यांच्या भूमिकेत दिसणार असून, वामिका गब्बी आणि जयदीप अहलावत यांच्याही महत्त्वपूर्ण भूमिका आहेत. या चित्रपटाचे दिग्दर्शन अविनाश अरुण यांनी केले असून, दिनेश विजन यांनी निर्मिती केली आहे. हा चित्रपट १६ ऑक्टोबर २०२६ रोजी प्रेक्षकांच्या भेटीला येणार आहे.

1 October New Rules: LPG ते बँकिंग…आजपासून बदलले १० नियम; तुमच्या खिशावर किती परिणाम?