Airtel 249 Recharge Plan Closed: देशातील दुसऱ्या क्रमांकाची खासगी टेलिकॉम कंपनी एअरटेलने आपल्या ग्राहकांना मोठा धक्का दिला आहे. कंपनीने आपल्या पोर्टफोलिओमधील सर्वात स्वस्त आणि लोकप्रिय २४९ रुपयांचा प्रीपेड रिचार्ज प्लॅन बंद केला आहे. या प्लॅनमध्ये ग्राहकांना २४ दिवसांची वैधता, दररोज १ जीबी डेटा, अमर्यादित कॉलिंग आणि दररोज १०० मोफत एसएमएस मिळत होते. आता हा प्लॅन बंद झाल्याने ग्राहकांना याच सुविधांसाठी ५० रुपये जास्त खर्च करून २९९ रुपयांचा प्लॅन घ्यावा लागणार आहे. एअरटेल थँक्स अॅपवर प्लॅन गायब एअरटेलच्या ‘थँक्स’ अॅपवर आता २४९ रुपयांचा हा प्लॅन दिसेनासा झाला आहे. प्लॅन शोधताना ग्राहकांना एक सूचना मिळत आहे की, या प्लॅनची किंमत बदलण्यात आली आहे. हा प्लॅन ग्राहकांमध्ये अत्यंत लोकप्रिय होता, कारण यात कमी किमतीत अमर्यादित कॉलिंग, डेटा आणि एसएमएस सुविधा मिळत होत्या. २९९ रुपयांचा नवा पर्याय २४९ रुपयांचा प्लॅन बंद झाल्याने आता ग्राहकांना २९९ रुपये खर्च करावे लागतील. या नव्या प्लॅनमध्ये २८ दिवसांची वैधता मिळेल, जी मागील प्लॅनपेक्षा ४ दिवस जास्त आहे. याशिवाय, अमर्यादित कॉलिंग, दररोज १ जीबी डेटा आणि १०० मोफत एसएमएस यांसारख्या सुविधा पूर्वीप्रमाणेच मिळतील. हा प्लॅन सध्या एअरटेलचा सर्वात स्वस्त डेटा प्लॅन बनला आहे. जियोनंतर एअरटेलचा निर्णय यापूर्वी, रिलायन्स जियोनेही असाच २४९ रुपयांचा ‘ट्रूली अनलिमिटेड’ प्लॅन बंद केला होता. जियोच्या या प्लॅनमध्ये २८ दिवसांची वैधता आणि दररोज १.५ जीबी डेटा मिळत होता. आता जियो आणि एअरटेल या दोन्ही कंपन्यांनी आपले बजेट-फ्रेंडली प्लॅन बंद केल्याने ग्राहकांना महागड्या प्लॅनकडे वळावे लागणार आहे. जियोच्या ४४५ रुपयांच्या प्लॅनमध्ये २८ दिवसांची वैधता आणि दररोज २ जीबी डेटा मिळतो, म्हणजेच एकूण ५६ जीबी डेटा. व्होडाफोन आयडिया एकमेव पर्याय एअरटेल आणि जियोने २४९ रुपयांचे प्लॅन बंद केल्यानंतर, आता व्होडाफोन आयडिया (Vi) ही एकमेव टेलिकॉम कंपनी आहे जी अजूनही २४९ रुपयांचा प्रीपेड रिचार्ज प्लॅन ऑफर करत आहे. त्यामुळे स्वस्त प्लॅन शोधणाऱ्या ग्राहकांसाठी Vi हा एकमेव पर्याय राहिला आहे. ग्राहकांवर आर्थिक बोजा जियो आणि एअरटेलच्या या निर्णयामुळे ग्राहकांवर आर्थिक बोजा वाढणार आहे. कमी खर्चात जास्त सुविधा देणारे हे प्लॅन बंद झाल्याने ग्राहकांना आता जास्त पैसे मोजावे लागतील. टेलिकॉम क्षेत्रातील ही किंमतवाढ ग्राहकांसाठी चिंतेची बाब ठरत आहे.
