नवी दिल्ली – काँग्रेस नेते राहुल गांधी यांचे लोकसभा सदस्यत्व रद्द करण्याचा मुद्दा परदेशातही जोर धरू लागला आहे. याबाबत देशाच्या राजकारणात आधीच खळबळ उडाली होती. मात्र आता यावरून परदेशातूनही प्रतिक्रिया येत आहेत. अमेरिकेनंतर आता जर्मनीने राहुल गांधींच्या वादावर भाष्य केले आहे.

राहुल गांधींचे संसद सदस्यत्व रद्द झाले,त्यांच्या बाबत न्यायालयाने दिलेला निर्णय आणि इतर बाबींवर आम्ही लक्ष देऊन आहोत. असे जर्मनीच्या परराष्ट्र मंत्रालयाच्या प्रवक्त्याने सांगितले. ते पुढे म्हणाले की, आमच्या माहितीनुसार राहुल गांधी या निकालाविरोधात अपील करण्याच्या स्थितीत आहेत. निर्णय टिकेल की नाही आणि त्यांचे संसदेचे सदस्यत्व रद्द करण्याचे काही कारण आहे की नाही हे अपीलानंतर स्पष्ट होईल. न्यायिक स्वातंत्र्य आणि मूलभूत लोकशाही तत्त्वांचे पालन केले जावे अशी आमची अपेक्षा आहे.

अमेरिका काय म्हणाली?
जर्मनीपूर्वी अमेरिकेनेही या प्रकरणी प्रतिक्रिया दिली होती. अमेरिकेच्या परराष्ट्र विभागाचे प्रमुख उप प्रवक्ते वेदांत पटेल म्हणाले होते की, आम्ही भारतीय न्यायालयांमध्ये काँग्रेस नेते राहुल गांधी यांच्या प्रकरणावर लक्ष ठेवून आहोत. भारतातील अभिव्यक्ती स्वातंत्र्यासह लोकशाही मूल्यांसाठी अमेरिका भारत सरकारच्या पाठीशी उभी आहे, असेही ते म्हणाले.

मोदी आडनावावर वादग्रस्त टिप्पणी केली होती
2019 च्या लोकसभा निवडणुकीदरम्यान राहुल गांधी यांनी मोदी आडनावावर वादग्रस्त टिप्पणी केली होती. याप्रकरणी त्याच्यावर मानहानीचा खटला दाखल करण्यात आला आहे. सुरत न्यायालयाने राहुल गांधींना दोषी ठरवत दोन वर्षांच्या तुरुंगवासाची शिक्षा सुनावली आहे. न्यायालयाने दोषी ठरवल्यानंतर त्यांना लोकसभा सदस्य म्हणून अपात्र ठरवण्यात आले. राहुल गांधी केरळच्या वायनाड मतदारसंघातून खासदार झाले होते.