Adani – Tata Partnership : देशातील आघाडीची खासगी विमानतळ कंपनी अदानी एअरपोर्ट होल्डिंग्स लिमिटेड (AAHL) आणि टाटा समूहाची हॉस्पिटॅलिटी कंपनी द इंडियन हॉटेल्स कंपनी लिमिटेड (IHCL) यांच्यात अनेक हॉटेल्स विकसित करण्यासाठी करार झाला आहे. या करारानुसार मुंबई, अहमदाबाद, लखनौ आणि गुवाहाटी या चार शहरांमध्ये एकूण २,००० खोल्यांची क्षमता असलेली आठ हॉटेल्स उभारण्यात येणार आहेत.

ताज, विवान्ता, गेटवे आणि जिंजर ब्रँडची हॉटेल्स

या आठ हॉटेल्समध्ये ताज, विवान्ता, गेटवे आणि जिंजर या ब्रँडचा समावेश असेल. व्यावसायिक काम, पर्यटन किंवा प्रवासासाठी येणाऱ्या नागरिकांना त्यांच्या गरजेनुसार निवास आणि इतर सुविधा मिळणार आहेत. अदानी एअरपोर्ट्स हॉटेल्सची उभारणी करणार असून, IHCL या हॉटेल्सचे संचालन करणार आहे.

‘अदानी एअरपोर्ट सिटी’ची उभारणी

या प्रकल्पासाठी अदानी एअरपोर्ट्सने ‘अदानी एअरपोर्ट सिटी लिमिटेड’ ही कंपनी स्थापन केली आहे. सात राज्यांतील आठ विमानतळांवर ६५५ एकरांहून अधिक जमीन विकसित करण्याची योजना आहे. यामध्ये मुंबई आणि नवी मुंबईतील सुमारे ४४० एकर जमिनीचा समावेश आहे.

पहिल्या टप्प्यात मुंबई, नवी मुंबई, अहमदाबाद, लखनौ, जयपूर आणि गुवाहाटी येथे सुमारे २.२ कोटी चौरस फूट क्षेत्र विकसित केले जाणार आहे. यासाठी अदानी एअरपोर्ट सिटी २० हजार कोटी रुपयांहून अधिक गुंतवणूक करणार आहे.

कोणत्या शहरात किती हॉटेल्स?

या करारात तीन ताज, दोन विवान्ता, एक गेटवे आणि दोन जिंजर हॉटेल्सचा समावेश आहे.

मुंबई : विमानतळाच्या टर्मिनल-२ येथे एक ताज हॉटेल.

लखनौ : विमानतळाजवळ एक विवान्ता आणि एक जिंजर हॉटेल.

अहमदाबाद : एक ताज आणि एक विवान्ता हॉटेल.

गुवाहाटी : एक ताज, एक गेटवे आणि एक जिंजर हॉटेल.

या हॉटेल्समध्ये निवासासोबतच खाण्या-पिण्याची सुविधा, बैठका आणि कार्यक्रमांसाठी जागा, वेलनेस आणि मनोरंजनाच्या सुविधा उपलब्ध असतील.

जीत अदानी काय म्हणाले?

अदानी एअरपोर्ट होल्डिंग्सचे संचालक जीत अदानी यांनी सांगितले की, जगभरातील विमानतळ आता केवळ प्रवासाची ठिकाणे राहिलेली नाहीत. व्यापार, पर्यटन आणि शहरांच्या विकासाला चालना देणारी केंद्रे म्हणून त्यांचा विकास होत आहे.

IHCL सोबतची भागीदारी हा या दिशेने महत्त्वाचा टप्पा आहे. ताजसारख्या प्रसिद्ध ब्रँडच्या माध्यमातून जागतिक दर्जाच्या हॉटेल्स उभारण्याचे उद्दिष्ट आहे. या भागीदारीमुळे अदानींच्या ‘एअरपोर्ट सिटी’ प्रकल्पांमध्ये हॉस्पिटॅलिटी क्षेत्र अधिक मजबूत होईल आणि संबंधित शहरांच्या आर्थिक विकासालाही मदत होईल, असे त्यांनी सांगितले.