Nimisha Sajayan : चित्रपटातील भूमिका अधिक प्रभावी आणि अस्सल वाटावी यासाठी कलाकारांना अनेकदा त्यांच्या लूकमध्ये तसेच शारीरिक स्वरूपात बदल करावे लागतात. यासाठी त्यांना मोठी मेहनतही घ्यावी लागते. या माध्यमातून पात्र समजून घेण्यासोबतच ते प्रत्यक्षात जगण्याचा प्रयत्न कलाकार करत असतात. अभिनेत्री निमिषा सजयननेही आपल्या भूमिकेसाठी असाच मोठा बदल केला आहे. ‘बबिता सिंग रिपोर्टिंग’ या चित्रपटातील भूमिकेसाठी तिने तब्बल १४ किलो वजन वाढवलं आहे. नुकताच तिने या अनुभवाबद्दल खुलासा केला.

‘बबिता सिंग रिपोर्टिंग’ या क्राईम ड्रामा आणि मिस्ट्री-थ्रिलर चित्रपटात निमिषा पोलीस अधिकारी बबिता सिंग अर्थात ‘बेबी’ची भूमिका साकारत आहे. या भूमिकेसाठी तिची निवड झाली, त्यावेळी तिचं वजन सुमारे ५८ किलो होतं. त्यानंतर डॉक्टर, शेफ आणि इतर व्यावसायिकांच्या मदतीने तिने वजन वाढवण्याची तयारी सुरू केली. तिचा आहार हळूहळू वाढवण्यात आला. त्यानंतर तिचे वजन तब्बल ७२ किलो झाले.  (Nimisha Sajayan)

या अनुभवाबद्दल बोलताना निमिषाने सांगितलं, “माझ्यासाठी हा अनुभव एका दुःस्वप्नासारखा होता. दररोज ८ हजार कॅलरीज घेणं खूप जास्त होतं. अक्षरशः पोटात अन्न कोंबावं लागत होतं. मात्र, या संपूर्ण प्रक्रियेचा मला आनंदही मिळाला. त्यामुळे मी माझ्या पात्राच्या आणखी जवळ जाऊ शकले.”

मात्र, चित्रीकरण पूर्ण झाल्यानंतर पुन्हा वजन कमी करणं तिच्यासाठी तितकंच आव्हानात्मक ठरलं. चित्रीकरण संपल्यानंतर तिने वजन कमी करण्यास सुरुवात केली असून, या प्रवासातील काही पोस्टही तिने सोशल मीडियावर शेअर केल्या आहेत. आपल्या दिसण्यावर होणाऱ्या प्रतिक्रिया आणि मतांबद्दलही निमिषाने भाष्य केलं. लोकांच्या प्रतिक्रिया आता पूर्वीप्रमाणे आपल्यावर परिणाम करत नाहीत आणि त्या गोष्टी आपण फारशा गांभीर्याने घेत नसल्याचं तिने स्पष्ट केलं.

‘बबिता सिंग रिपोर्टिंग’ या चित्रपटाचं दिग्दर्शन अंबिका पंडित यांनी केलं आहे. चित्रपटात निमिषा सजयनसोबत अंशुमन पुष्कर, बरुण सोबती, सुनीता राजवार आणि राजेश कुमार यांच्या प्रमुख भूमिका आहेत. या चित्रपटाचा प्रीमियर २८ ऑगस्ट रोजी अॅमेझान प्राइमवर झाला आहे. चित्रपटातील निमिषाने साकारलेल्या व्यक्तिरेखेचं कौतुक होत आहे.

CJI-NALSAR Dispute: सर्वोच्च न्यायालयाकडून BCI चा ‘तो’ निर्णय रद्द ; विद्यार्थ्यांच्या निषेधाच्या अधिकारावर शिक्कामोर्तब