Mamata Datta joined the (JDU) :  आगामी पंजाब विधानसभा निवडणुकीच्या पार्श्वभूमीवर राज्यातील राजकीय घडामोडींना वेग आला आहे. जनता दल (युनायटेड) अर्थात जेडीयूने शिरोमणी अकाली दल श्री आनंदपूर साहिब (एसएडीएसएएस) सोबत युती केली आहे. अशातच बॉलिवूड अभिनेता संजय दत्त याची चुलत बहीण ममता दत्त यांनी जेडीयूमध्ये प्रवेश केला आहे. त्यामुळे आगामी पंजाब विधानसभा निवडणुकीत त्या उमेदवार म्हणून मैदानात उतरणार का, याबाबत राजकीय वर्तुळात चर्चांना उधाण आले आहे.

कोण आहेत ममता दत्त?

ममता दत्त यांची ओळख केवळ अभिनेता संजय दत्त याची चुलत बहिणीपुरती मर्यादित नाही. गेल्या अनेक दशकांपासून त्या कॉर्पोरेट क्षेत्रात कार्यरत आहेत. सामाजिक क्षेत्रातही त्यांनी सक्रिय सहभाग नोंदवला असून, त्या ‘दत्त फाऊंडेशन फॉर सोशल वेल्फेअर’च्या संस्थापक आहेत.

सामाजिक कल्याणाच्या माध्यमातून समाजात सकारात्मक आणि अर्थपूर्ण बदल घडवून आणण्यासाठी सक्रिय सहभाग आणि सेवाभाव आवश्यक असल्याचे ममता दत्त यांनी यापूर्वी म्हटले आहे. सामाजिक कार्यामुळे करुणा आणि जबाबदारीचे महत्त्व अधिक जाणवल्याचेही त्यांनी सांगितले आहे.

जेडीयूमध्ये प्रवेश केल्यानंतर ममता दत्त काय म्हणाल्या?

जेडीयूमध्ये प्रवेश केल्यानंतर ममता दत्त यांनी आपल्या सामाजिक कार्यातील मूल्यांना सार्वजनिक जीवनातही पुढे नेण्याचा निर्धार व्यक्त केला. सार्वजनिक जीवनात रचनात्मक योगदान देण्याचा आणि समाजासाठी काम करण्याचा प्रयत्न करणार असल्याचे त्यांनी सांगितले.

जेडीयू-एडीएसएएस युतीची तयारी वेगात

पंजाबमधील जेडीयू आणि एसएडीएसएएस यांच्या युतीबाबत जेडीयू पंजाबचे प्रदेशाध्यक्ष मलविंदर सिंह बेनीपाल यांनीही भूमिका स्पष्ट केली आहे. समान विचारधारा असलेल्या घटकांना एका व्यासपीठावर आणण्यासाठी ही आघाडी करण्यात आल्याचे त्यांनी म्हटले.

एसएडीएसएएसचे अध्यक्ष दविंदर सिंह यांनीही पंजाबमध्ये मजबूत आघाडी उभारण्याचा उद्देश असल्याचे सांगितले. दोन्ही पक्ष एकत्रितपणे राज्यातील विविध प्रश्नांवर आवाज उठवणार असून, संघटनात्मक विस्तारावरही भर दिला जाणार असल्याचे त्यांनी स्पष्ट केले.

या आघाडीकडून पंजाबमधील सर्व ११७ विधानसभा मतदारसंघांमध्ये उमेदवार देण्याची तयारी करण्यात येत आहे. यासाठी दोन्ही पक्षांमध्ये किमान समान कार्यक्रमावरही एकमत झाल्याचे सांगण्यात येत आहे. माझा, दोआबा, लुधियाना, जीटी रोड तसेच राजापुरा-पटियाला या भागांवर विशेष लक्ष केंद्रित करण्याची रणनीती आखली जात असल्याचे समोर आले आहे.

Satara: दीपक माळी यांची शिरवळ मुलींच्या शाळेस भेट, ‘चला शाळेत जाऊया’ उपक्रमांतर्गत आयोजन