Actor Dino Morea Arrested – बॉलिवूड अभिनेता दिनो मोरियाला मुंबई पोलिसांकडून अटक करण्यात आली आहे. मिठी नदी गैरव्यवहार प्रकरणी मुंबई पोलिसांनी दिनो मोरियाला मुंबईतील राहत्या घरातून अटक केली. अटकेनंतर दिनो मोरियाला अधिक चौकशीसाठी मुंबई पोलीस आयुक्तालयात आणण्यात आले.

मुंबई पोलिसांच्या आर्थिक गुन्हे शाखेकडून सकाळपासून दिनो मोरिया याची चौकशी सुरू होती. सुमारे आठ तास चाललेल्या या चौकशीनंतर पोलिसांनी त्याला ताब्यात घेत अटक केली.

दिनो मोरियावर यापूर्वी दिशा सालियन प्रकरणातही आरोप करण्यात आले होते. इतकेच नाही तर मिठी नदी गैरव्यवहार प्रकरणात मोरियाला ईडी चौकशीलाही सामोरे जावे लागले होते. तसेच, त्याच्या राहत्या घरी छापेमारीही करण्यात आली होती.

मिठी नदी गाळ उपसा गैरव्यवहार आणि दिनो मोरिया यांचे कनेक्शन मुंबई महानगरपालिकेच्या सफाई कंत्राटातील 65 कोटी रुपयांच्या आर्थिक अफरातफरीच्या तपासाशी संबंधित आहे.

मिठी नदी घोटाळा प्रकरणातील मुख्य आरोपी केतन कदमने दिनो मोरिया आणि त्याचा भाऊ सँटिनो मोरियाशी अनेक फोनवरून संभाषण केले होते. आरोपीशी संबंधित कॉल रेकॉर्ड आणि आर्थिक व्यवहारांच्या विश्लेषणादरम्यान दिनो मोरियाचे नाव पुढे आले होते.

काय आहे प्रकरण?

बीएमसीने स्लज पुशर्स आणि ड्रेजिंग मशीन्सचा वापर करून मिठी नदीच्या साफसफाईची मोहीम हाती घेतली होती. या मशीन्स कोचीस्थित मॅटप्रॉप टेक्निकल सर्व्हिसेस प्रायव्हेट लिमिटेड या कंपनीकडून मोठ्या रकमेला खरेदी करण्यात आल्या होत्या.

या तपासादरम्यान असे निष्पन्न झाले की, केतन कदम आणि जय जोशी यांनी मॅटप्रॉप आणि बीएमसीच्या स्टॉर्म वॉटर ड्रेन्स विभागातील अधिकाऱ्यांशी संगनमत करून, या साफसफाई प्रकल्पाच्या नावाखाली 65 कोटी रुपयांचा घोटाळा केला.

या घोटाळ्यातील मुख्य आरोपी केतन कदम याच्या कॉल रेकॉर्ड्सची तपासणी केली असता, अभिनेता दिनो मोरिया आणि त्याच्या भावाची नावे समोर आली होती. आर्थिक गुन्हे शाखेने बीएमसी अधिकारी आणि कंत्राटदारांसह एकूण 13 जणांविरोधात मिठी नदी घोटाळ्याप्रकरणी गुन्हा दाखल केला होता.