Actor Asrani dies : ज्येष्ठ अभिनेते गोवर्धन असरानी यांनी ‘शोले’, ‘मेरे अपने’, ‘बावर्ची’, ‘अभिमान’ आणि ‘चुपके-चुपके’ यांसारख्या चित्रपटांमध्ये अविस्मरणीय काम केले आहे. विनोदी भूमिकांसाठी त्यांची विशेष ओळख होती. हिंदी चित्रपटसृष्टीतील प्रसिद्ध अभिनेते आणि दिग्दर्शक गोवर्धन असरानी यांचे सोमवारी (20 ऑक्टोबर) दुपारी मुंबईतील जुहू येथील आरोग्य निधी रुग्णालयात निधन झाले. ते 84 वर्षांचे होते. असरानी यांच्या पार्थिवावर सांताक्रूझ येथील शास्त्री नगर स्मशानभूमीत सायंकाळी कुटुंब आणि जवळच्या लोकांच्या उपस्थितीत शांतपणे अंत्यसंस्कार करण्यात आले. त्यांचे व्यवस्थापक बाबुभाई थीबा यांनी सांगितले की, असरानी यांची तब्येत गेल्या काही दिवसांपासून ठीक नव्हती आणि आज त्यांनी अखेरचा श्वास घेतला. मिळालेल्या माहितीनुसार, असरानी यांना त्यांच्या निधनानंतर कोणताही गोंधळ किंवा गडबड नको होती. त्यांनी त्यांची पत्नी मंजू असरानी यांना आधीच सांगितले होते की त्यांच्या मृत्यूची बातमी कोणालाही देऊ नये. याच कारणामुळे कुटुंबाने कोणतीही औपचारिक घोषणा न करता त्यांचे अंत्यसंस्कार शांतपणे पार पाडले. शेकडो चित्रपटांमध्ये केले काम – गोवर्धन असरानी यांनी त्यांच्या प्रदीर्घ कारकिर्दीत शेकडो चित्रपटांमध्ये अभिनय केला आणि त्यांच्या विनोदी वेळेमुळे (कॉमिक टाइमिंग) आणि अनोख्या शैलीमुळे प्रेक्षकांच्या मनात स्थान निर्माण केले. ‘शोले’मधील जेलरच्या भूमिकेपासून ते ‘चुपके चुपके’, ‘आ अब लौट चलें’ आणि ‘हेरा फेरी’ यांसारख्या चित्रपटांपर्यंत, असरानी यांनी प्रत्येक पिढीला आपल्या कलेने प्रभावित केले. हिंदी चित्रपटसृष्टीने असा एक अभिनेता गमावला आहे, ज्याने हास्य आणि अभिनय या दोन्हींनी प्रेक्षकांचे मन जिंकले. पाच दशकांहून अधिक काळ चित्रपटसृष्टीत काम – असरानी मूळचे राजस्थानमधील जयपूर शहराचे होते. त्यांचे शिक्षण सेंट झेवियर्स स्कूल, जयपूर येथून झाले. पाच दशकांहून अधिक काळ चाललेल्या त्यांच्या कारकिर्दीत असरानी यांनी 350 हून अधिक चित्रपटांमध्ये काम केले. त्यांनी विनोदी अभिनेता आणि सहायक अभिनेता म्हणून अनेक संस्मरणीय भूमिकांमधून आपली ओळख निर्माण केली. 1970 च्या दशकात ते त्यांच्या करिअरच्या शिखरावर होते. या काळात त्यांनी ‘मेरे अपने’, ‘कोशिश’, ‘बावर्ची’, ‘परिचय’, ‘अभिमान’, ‘चुपके-चुपके’, ‘छोटी सी बात’, ‘रफू चक्कर’ यांसारख्या चित्रपटांमध्ये काम केले. 1975 मध्ये प्रदर्शित झालेल्या ‘शोले’ चित्रपटातील जेल वॉर्डनची त्यांची भूमिका नेहमीच लक्षात ठेवली जाईल.
