नवी दिल्ली : तिरुपती मंदिराची प्रशासकीय संस्था असलेल्या तिरुमला तिरुपती देवस्थानमने १८ बिगर हिंदू कर्मचाऱ्यांवर कारवाई केली आहे. त्या सर्वांना बदली घेण्यास किंवा स्वेच्छा निवृत्ती योजना घेण्यास सांगण्यात आले आहे. मंडळाने म्हटले आहे की हा निर्णय त्यांच्या मंदिरांचे आणि धार्मिक उपक्रमांचे आध्यात्मिक पावित्र्य राखण्याच्या त्यांच्या वचनबद्धतेनुसार आहे.

टीटीडी उत्सव आणि विधी तसेच गैर-हिंदू धार्मिक कार्यात सहभागी झाल्याच्या आरोपाखाली १८ कर्मचाऱ्यांवर शिस्तभंगाची कारवाई करण्याचे आदेश जारी करण्यात आले आहेत. भगवान वेंकटेश्वर मंदिराच्या पावित्र्यासाठी या कर्मचाऱ्यांना काढून टाकण्याचा निर्णय घेण्यात आला आहे,असे आदेशात लिहिले आहे. टीटीडी बोर्डाने अलीकडेच अशा कर्मचाऱ्यांना सरकारी विभागात स्थानांतरित करण्याचा किंवा स्वेच्छा निवृत्ती योजनेद्वारे टप्प्याटप्प्याने काढून टाकण्याचा निर्णय घेतला आहे.

टीटीडीचे अध्यक्ष बीआर नायडू म्हणाले की, मंदिराचे पावित्र्य लक्षात घेऊन हे पाऊल उचलण्यात आले आहे. नोव्हेंबर २०२४ मध्ये टीटीडी बोर्डाने आणखी एक ठराव मंजूर केला होता, ज्या अंतर्गत बोर्डात नोकरी करणाऱ्या गैर-हिंदूंना स्वेच्छा निवृत्ती घ्यावी लागेल किंवा आंध्र प्रदेशातील इतर सरकारी विभागात बदलीचा पर्याय निवडावा लागेल असे त्यात म्हटले होते.

बोर्डाने तिरुमलामध्ये राजकीय विधानांवर बंदी घालणारा ठराव देखील मंजूर केला आहे. ज्यामध्ये असे म्हटले आहे की उल्लंघन करणाऱ्यांवर तसेच त्यांना प्रोत्साहन देणाऱ्यांवर कायदेशीर कारवाई केली जाईल. टीटीडी १२ मंदिरे आणि उप-मंदिरांची देखभाल करते आणि १४ हजारांहून अधिक लोकांना रोजगार देते.