Shweta Tiwari: अभिनेत्री श्वेता तिवारी सोशल मीडिया पोस्टमुळे पुन्हा एकदा चर्चेत आली आहे. काही दिवसांपूर्वी महिलांविरोधात अपमानास्पद टिप्पणी करणाऱ्या काही सोशल मीडिया अकाऊंट्सवरून तिने मनसेवर सवाल उपस्थित केले होते. मात्र, आता याच प्रकरणात मनसेकडून दखल घेतल्यानंतर श्वेता तिवारीने मनसे अध्यक्ष राज ठाकरे आणि पक्षातील नेत्या स्नेहल अडारकर यांचे आभार मानले आहेत.

काही दिवसांपूर्वी श्वेता तिवारीने सोशल मीडियावर एक पोस्ट शेअर केली होती. या पोस्टमध्ये काही व्यक्ती महिलांविषयी अपमानास्पद आणि आक्षेपार्ह टिप्पणी करत असल्याचे तिने म्हटले होते. संबंधित सोशल मीडिया अकाऊंट्सचे स्क्रीनशॉटही तिने शेअर केले होते.

अशा प्रकारचे ऑनलाइन गैरवर्तन करणाऱ्यांना आपण सहजपणे सुटू शकतो, असे वाटू नये, अशी भूमिका श्वेताने घेतली होती. तसेच, संबंधित व्यक्ती मनसेचे समर्थक असल्याचा दावा करत असल्याने तिने राज ठाकरे यांच्यासमोरही प्रश्न उपस्थित केला होता. पक्षाशी संबंधित असल्याचा दावा करणाऱ्या व्यक्तींचे महिलांविषयीचे असे वर्तन मान्य आहे का, असा सवाल तिने केला होता.

मनसेच्या नेत्या स्नेहल अडारकर यांनी घेतली दखल

श्वेताच्या या पोस्टनंतर मनसेच्या नेत्या स्नेहल अडारकर यांनी तिच्याशी संपर्क साधल्याचे अभिनेत्रीने सांगितले. महिलांविषयी अशा प्रकारचे वर्तन कोणत्याही परिस्थितीत सहन केले जाणार नाही, असे अडारकर यांनी स्पष्ट केल्याचे श्वेताने आपल्या पोस्टमध्ये म्हटले आहे.

तसेच, या प्रकरणात सहभागी असलेल्या व्यक्ती पक्षाचे अधिकृत सदस्य नसल्याचेही स्नेहल अडारकर यांनी श्वेताला सांगितले. संबंधित व्यक्ती नेमकी कोण आहे, याचा शोध घेण्याचा प्रयत्न केला जाईल, असेही त्यांनी स्पष्ट केले.

श्वेता तिवारीच्या म्हणण्यानुसार, स्नेहल अडारकर यांनी या प्रकरणासाठी काही दिवसांचा वेळ मागितला होता. मात्र, अवघ्या तीन दिवसांतच संबंधित व्यक्तींचा फोन नंबर आणि त्यांनी लिहिलेले माफीनामे श्वेताला पाठवण्यात आले.

महिलांचा अपमान सहन केला जाणार नाही

या प्रकरणात मनसेकडून गांभीर्याने दखल घेण्यात आल्याचे श्वेता तिवारीने आपल्या पोस्टमध्ये नमूद केले. महिलांचा अपमान करणारे वर्तन आपल्याला आणि आपल्या पक्षाला मान्य नाही, असे स्नेहल अडारकर यांनी स्पष्ट केल्याचे तिने सांगितले. भविष्यात अशा प्रकारची समस्या उद्भवल्यास आपण थेट संपर्क करू शकता, असेही अडारकर यांनी सांगितल्याचे श्वेताने म्हटले आहे. त्यामुळे हे प्रकरण गांभीर्याने हाताळल्याबद्दल तिने त्यांचे कौतुक केले.

राज ठाकरेंचेही मानले आभार

श्वेता तिवारीने संबंधित व्यक्तींकडून पाठवण्यात आलेला माफीनामाही सोशल मीडिया पोस्टमध्ये शेअर केला आहे. मात्र, हा मुद्दा केवळ एका व्यक्तीपुरता किंवा एका घटनेपुरता मर्यादित नसल्याचे तिने म्हटले.

ऑनलाइन गैरवर्तनाचे प्रमाण वाढत असून सोशल मीडिया प्लॅटफॉर्म्सनी यावर प्रभावी तोडगा काढण्याची गरज असल्याचे श्वेताने नमूद केले. तंत्रज्ञान आणि सोशल मीडिया कंपन्यांनी अशा प्रकारच्या गैरवर्तनावर नियंत्रण आणण्यासाठी प्रयत्न करावेत, अशी अपेक्षाही तिने व्यक्त केली.

दरम्यान, या प्रकरणाची दखल घेतल्याबद्दल श्वेता तिवारीने मनसेच्या नेत्या स्नेहल अडारकर यांचे कौतुक केले. तसेच, संपूर्ण प्रकरण गांभीर्याने घेतल्याबद्दल मनसे अध्यक्ष राज ठाकरे यांचेही तिने आभार मानले. त्यामुळे काही दिवसांपूर्वी मनसेवर सवाल उपस्थित करणारी श्वेता आता त्याच प्रकरणात राज ठाकरेंचे आभार मानताना दिसल्याने तिची पोस्ट चर्चेचा विषय ठरली आहे.