Petrol-Diesel: गेल्या काही तासांपासून सोशल मीडियावर पेट्रोल आणि डिझेलच्या तुटवड्याबाबत पसरत असलेल्या बातम्या निव्वळ अफवा असून, पुणे जिल्ह्यात इंधनाचा पुरेसा साठा उपलब्ध आहे. नागरिक आणि वाहनधारकांनी कोणत्याही अफवांवर विश्वास ठेवू नये, असे आवाहन पुण्याचे जिल्हाधिकारी जितेंद्र डुडी यांनी केले आहे. प्रशासनाकडून परिस्थिती स्पष्ट – जिल्हाधिकारी डुडी यांनी माहिती दिली की, इंधन पुरवठ्याबाबत ‘डिलर असोसिएशन’ आणि संबंधित तेल कंपन्यांसोबत सविस्तर बैठक पार पडली आहे. सध्या जिल्ह्यात पेट्रोल आणि डिझेलचा साठा भरपूर असून, पुरवठा साखळीत कोणताही अडथळा नाही. त्यामुळे नागरिकांनी पेट्रोल पंपांवर विनाकारण गर्दी करण्याची किंवा साठा करण्याची आवश्यकता नाही. हेही वाचा – युद्ध रोखण्यासाठी इराणने जगासमोर ठेवल्या ‘या’ 5 अटी; अन्यथा मोठा विध्वंस करण्याचा इशारा अफवा पसरवणाऱ्यांना कडक इशारा – सोशल मीडियाच्या माध्यमातून चुकीची माहिती आणि भीती पसरवणाऱ्यांविरुद्ध प्रशासनाने कडक पवित्रा घेतला आहे. जिल्हाधिकारी म्हणाले, “चुकीच्या बातम्या किंवा अफवा पसरवणाऱ्यांवर आमचे विशेष लक्ष आहे. जे कोणी विनाकारण संभ्रम निर्माण करतील, त्यांच्यावर माहिती तंत्रज्ञान कायद्यानुसार (IT Act) कठोर कायदेशीर कारवाई केली जाईल.” प्रशासनाने नागरिकांना विनंती केली आहे की, इंधनाचा तुटवडा असल्याचे सांगणारे मेसेज फॉरवर्ड करण्यापूर्वी त्याची सत्यता पडताळून पाहावी.