Abhijeet Dipke : कॉक्रोच जनता पार्टीचा (सीजेपी) संस्थापक अभिजीत दिपके (Abhijeet Dipke) ६ जूनला अमेरिकेतून भारतात परतणार आहे. मायदेशी दाखल झाल्यानंतर आंदोलन छेडण्याचा मानस त्याने जाहीर केला. त्या आंदोलनाच्या माध्यमातून विविध परीक्षांमधील गोंधळाबद्दल केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी लावून धरली जाईल.

अभिजीतने (Abhijeet Dipke) सीजेपीचे समर्थक आणि विद्यार्थ्यांना उद्देशून सोशल मीडियावरून एक व्हिडीओ जारी केला. त्यामधून त्याने दिल्लीतील शांततापूर्ण आंदोलनात सहभागी होण्याचे आवाहन केले. आपण सर्वांनी एकत्र येण्याची वेळ आली आहे. राज्यघटनेने आखून दिलेला मार्ग अनुसरून प्रधान यांच्या राजीनाम्याच्या मागणीसाठी शांततेने आवाज उठवू. आपण एकत्रितपणे उठवलेला आवाज सत्ताधाऱ्यांना ऐकावाच लागेल.

मी शनिवारी सकाळी दिल्लीत पोहचेन. त्यावेळी दिल्ली विमानतळावर या. तिथून आपण एकत्रितपणे संसद मार्ग पोलीस ठाण्यात जाऊ. जंतर-मंतर परिसरात शांततामय मार्गाने निदर्शने करण्यासाठी पोलिसांकडे परवानगी मागू,असे भाष्य त्याने केले.

मायदेशी परतल्यावर मला अटक होईल, अशी धास्ती माझ्या कुटूंबीयांना आणि मित्रांना वाटते. मात्र, शांततापूर्ण आंदोलनाला परवानगी मिळण्याची आशा मला वाटते. भारत आजही लोकशाही देश असल्याची मला खात्री आहे. राज्यघटनेवर माझी श्रद्धा आहे. तुरूंगाच्या धास्तीने आपण किती काळ भीतीच्या छायेत जगणार? लाखों विद्यार्थ्यांच्या हितासाठी आपण एकत्र येऊ.

नीट, सीबीएसई आणि इतर परीक्षांमधील गोंधळाचा फटका १ कोटीहून अधिक विद्यार्थ्यांना बसला. विद्यार्थ्यांना त्यांच्या भविष्याविषयी चिंता वाटत आहे. प्रचंड गोंधळानंतरही शिक्षण मंत्री राजीनामा देत नसतील; तर देशात उत्तरदायित्वासारखी बाब उरली नसल्याचा अर्थ निघतो.

प्रधान यांच्या राजीनाम्याच्या मागणीसाठी मी ऑनलाईन मोहीम राबवली. त्या मोहिमेला ८ लाख स्वाक्षऱ्यांच्या माध्यमातून मोठा पाठिंबा मिळाला. महाराष्ट्र, उत्तरप्रदेश, राजस्थानात शैक्षणिक मुद्द्यांवरून निदर्शनांचे सत्र सुरू आहे, याकडेही अभिजीतने (Abhijeet Dipke) लक्ष वेधले.