चंडीगड : पंजाबमधून आम आदमी पक्षाला (AAP) मोठा धक्का बसला आहे. राज्यातील कॅबिनेट मंत्री आणि लोकप्रिय गायिका अनमोल गगन मान यांनी आमदार पदाचा राजीनामा दिला असून, त्यांनी राजकारणही पूर्णपणे सोडण्याचा निर्णय घेतला आहे. त्यांच्या या अचानक घेतलेल्या निर्णयाने पंजाबच्या राजकीय वर्तुळात चर्चांना उधाण आलं आहे. राजकारणात गाजलेली ‘गायिका’ आता पूर्ण विरामावर अनमोल गगन मान या पंजाबच्या प्रसिद्ध लोकगायिका असून त्यांच्या गाण्यांना देश-विदेशात प्रचंड लोकप्रियता मिळाली आहे. 2022 च्या विधानसभा निवडणुकीआधी अरविंद केजरीवाल यांच्या आग्रहावरून त्यांनी AAP मध्ये प्रवेश केला होता. खरड मतदारसंघातून त्यांनी पहिल्याच प्रयत्नात विजय मिळवून सर्वांनाच आश्चर्यचकित केलं होतं. त्या विजयामुळे त्यांना थेट कॅबिनेट मंत्रीपद मिळालं होतं. एक्सवर भावनिक पोस्ट करत निर्णय जाहीर आपल्या राजीनाम्याबाबत अनमोल गगन मान यांनी पंजाबी भाषेत एक्स (Twitter) वर भावनिक पोस्ट केली. त्या म्हणाल्या, “माझं मन खूप जड आहे, पण मी राजकारणातून बाहेर पडण्याचा निर्णय घेतला आहे. माझा आमदार पदाचा राजीनामा विधानसभा अध्यक्षांनी स्वीकारावा. माझ्या शुभेच्छा पक्षासोबत आहेत. मला आशा आहे की पंजाब सरकार लोकांच्या अपेक्षा पूर्ण करेल.” AAPसाठी चिंतेची घंटा; दुसऱ्या मंत्र्याचा आधीच राजीनामा यापूर्वीही आम आदमी पक्षाला पंजाबमध्ये मोठा झटका बसला होता. कॅबिनेट मंत्री कुलदीप सिंह धालीवाल यांनीही काही दिवसांपूर्वी पदाचा राजीनामा दिला होता. त्यांचा विभाग मान सरकारने आधीच काढून घेतला होता. त्यांनी स्पष्ट केलं होतं की ते कुठल्याही इतर पक्षात जाणार नाहीत आणि पक्षाशी निष्ठावान राहतील. AAP सरकार अडचणीत? – अपूर्ण वचने, भ्रष्टाचार आणि ड्रग्ज संकट दिल्ली विधानसभा निवडणुकीत झालेल्या पराभवानंतर पंजाब हे AAP चे एकमेव सत्ताधारी राज्य राहिलं आहे. मात्र, काही महत्त्वाचे वादग्रस्त मुद्दे – जसे की अपूर्ण वचने, वाढता भ्रष्टाचार आणि ड्रग्स समस्या – यामुळे मुख्यमंत्री भगवंत मान यांच्या अडचणी वाढत आहेत. त्यातच आता वरिष्ठ नेत्यांचे राजीनामे हे पक्षासाठी आणखी आव्हान ठरत आहेत. काँग्रेस-भाजपचा दबाव वाढतोय AAPला जेव्हा अशा अंतर्गत अडचणींना तोंड द्यावं लागत आहे, तेव्हा दुसरीकडे काँग्रेसने पुन्हा सत्ता मिळवण्यासाठी जोरदार मोर्चेबांधणी सुरू केली आहे. भाजपसुद्धा पंजाबमध्ये आपली पकड वाढवण्याच्या प्रयत्नात आहे. शिरोमणी अकाली दल व अन्य प्रादेशिक पक्षही सज्ज झाले आहेत. अशा वेळी कॅबिनेटमधून एकामागून एक राजीनामे हे AAP साठी संकटाची घंटा ठरू शकतात.
