Aamir Khan : अभिनेता टायगर श्रॉफच्या कारवर १८ ऑक्टोबरला हल्ला झाला  होता. त्याचा सध्या तपास सुरु आहे. अशातच आता अभिनेता आमिर खानला धमकी मिळाल्याचे वृत्त समोर आले आहे. लॉरेन्स बिश्नोई गटाशी संबंध असल्याचा दावा करणाऱ्या सोशल मीडिया खात्यावरून ही धमकी देण्यात आल्याचे सांगितले जात आहे.

दरम्यान, मुंबई क्राइम ब्रँचच्या तपासाशी संबंधित सूत्रांच्या माहितीनुसार, टायगर श्रॉफच्या कारवरील हल्ल्याप्रकरणातील संशयितांनी मुंबईतील काही बॉलिवूड कलाकारांच्या घरांची पाहणी केल्याचा संशय आहे. यामध्ये अमिताभ बच्चन, आमिर खान, अक्षय कुमार आणि सलमान खान यांच्या नावांचा समावेश आहे.

सूत्रांच्या माहितीनुसार, संशयित काही दिवसांपूर्वी मुंबईत आले होते. त्यांनी ऑटोचालकांच्या मदतीने काही कलाकारांच्या घरांची माहिती घेतल्याचा दावा केला जात आहे. टायगर श्रॉफ नियमितपणे ज्या ठिकाणी जातात, त्याचीही माहिती घेण्यात आल्याचे तपासात समोर आल्याचे सांगितले जात आहे.

मात्र, आमिर खानला धमकी देणारे सोशल मीडिया खाते आणि टायगर श्रॉफ प्रकरणातील संशयित यांचा थेट संबंध असल्याचे अद्याप स्पष्ट झालेले नाही. सोशल मीडिया खात्यावरील दाव्यांचीही स्वतंत्र पुष्टी झालेली नाही. प्रकरणाचा तपास सुरू आहे.