Tiger Shroff : अभिनेता टायगर श्रॉफने मुंबईतील खार पश्चिम परिसरातील आलिशान फ्लॅट विकल्याची माहिती समोर आली आहे. ‘हिंदुस्तान टाइम्स’च्या वृत्तानुसार आणि CRE Matrixच्या माहितीनुसार, या फ्लॅटचा व्यवहार तब्बल ९ कोटी रुपयांना झाला आहे.

टायगर श्रॉफचा हा फ्लॅट खार पश्चिम येथील रुस्तोमजी पॅरामाउंट डी को-ऑपरेटिव्ह हाऊसिंग सोसायटीच्या नवव्या मजल्यावर होता. फ्लॅटचे कार्पेट क्षेत्रफळ १,२९१.१४ चौ. फूट असून, त्यासोबत ९५.८० चौ. फुटांचे अतिरिक्त क्षेत्रफळ आहे. हा व्यवहार अंदाजे ६४,८९१ रुपये प्रति चौ. फूट दराने झाल्याचे सांगण्यात आले आहे. या व्यवहारासाठी सुमारे ५४ लाख रुपयांची स्टॅम्प ड्युटी भरण्यात आली. फ्लॅटसोबत दोन कव्हर कार पार्किंगची सुविधाही होती.

सहा वर्षांपूर्वी ७.६१ कोटींना खरेदी –

मिळालेल्या माहितीनुसार, टायगरने हा फ्लॅट जुलै २०१८ मध्ये ७.६१ कोटी रुपयांना खरेदी केला होता. त्यानंतर ३० नोव्हेंबर २०१९ रोजी त्याने या मालमत्तेचा ताबा घेतला होता. आता सुमारे आठ वर्षांनंतर हा फ्लॅट ९ कोटी रुपयांना विकण्यात आला आहे.

गोळीबारानंतर विक्रीची चर्चा –

काही दिवसांपूर्वी जुहू येथील मैदानात फुटबॉल खेळून घरी परतताना टायगर श्रॉफवर गोळीबार झाल्याचे वृत्त समोर आले होते. दोन हल्लेखोरांनी काही सेकंदांत सात राऊंड गोळीबार करून तेथून पळ काढल्याचे सांगण्यात आले. या घटनेत टायगर सुरक्षित राहिला; मात्र त्याचा चालक आणि अन्य एक व्यक्ती जखमी झाल्याची माहिती आहे. या प्रकरणात पोलिसांनी ११ आरोपींना अटक केल्याचे वृत्त आहे.

गोळीबाराच्या घटनेनंतर काही दिवसांतच टायगरने फ्लॅट विकल्याची माहिती समोर आल्याने या व्यवहाराची चर्चा होत आहे. मात्र, गोळीबारामुळेच घर विकण्याचा निर्णय घेतला का, याबाबत कोणतीही अधिकृत माहिती समोर आलेली नाही.