Adi Anant Box Office : बॉक्स ऑफिसवर ‘आदि अनंत’ची दमदार कामगिरी; पहिल्याच आठवड्यात कमावले २.१६ कोटी
Adi Anant Box Office : चित्रपटाला मिळणारा वाढता प्रतिसाद पाहता त्याच्या शोमध्येही वाढ करण्यात आली आहे. सध्या महाराष्ट्रातील सुमारे २०० चित्रपटगृहांमध्ये २५० हून अधिक शोसह ‘आदि अनंत’ प्रेक्षकांच्या भेटीला येत आहे.

Adi Anant Box Office : मराठी चित्रपटसृष्टीत सध्या चर्चेत असलेल्या ‘आदि अनंत’ या चित्रपटाने बॉक्स ऑफिसवर दमदार कामगिरी करत प्रेक्षकांची मने जिंकली आहेत. प्रदर्शनाच्या पहिल्याच आठवड्यात चित्रपटाने तब्बल २.१६ कोटी रुपयांची कमाई केली असून, दुसऱ्या आठवड्यातही त्याची यशस्वी घोडदौड सुरू आहे.
चित्रपटाला मिळणारा वाढता प्रतिसाद पाहता त्याच्या शोमध्येही वाढ करण्यात आली आहे. सध्या महाराष्ट्रातील सुमारे २०० चित्रपटगृहांमध्ये २५० हून अधिक शोसह ‘आदि अनंत’ प्रेक्षकांच्या भेटीला येत आहे. एकाच वेळी पाच मराठी चित्रपटांची स्पर्धा असतानाही या चित्रपटाने दुसऱ्या आठवड्यात दिमाखात प्रवेश केला आहे.
आजोबा आणि नातवामधील नात्याचे भावविश्व हा चित्रपटाचा मुख्य गाभा आहे. दोन पिढ्यांमधील मतभेद, त्यांच्यातील संवाद, प्रेम, जिव्हाळा आणि एकमेकांबद्दलची ओढ या भावनांचे सुंदर चित्रण चित्रपटात करण्यात आले आहे. त्यामुळे ही कथा प्रेक्षकांच्या मनाला भावत आहे.
ज्येष्ठ अभिनेते अशोक सराफ आणि संकर्षण कऱ्हाडे यांच्या अभिनयाने चित्रपटाला विशेष उंची मिळाली आहे. दोघांमधील सहजसुंदर केमिस्ट्री आणि भावनिक प्रसंगांमधील प्रभावी अभिनय प्रेक्षकांची दाद मिळवत आहे. मनोरंजनासोबतच नात्यांकडे नव्या दृष्टिकोनातून पाहण्याची जाणीव करून देणारा हा चित्रपट प्रेक्षकांशी भावनिक नाते जोडण्यात यशस्वी ठरत आहे.
पॅनोरमा स्टुडिओज प्रस्तुत या चित्रपटाची निर्मिती कुमार मंगत पाठक, अभिषेक पाठक, मुरलीधर छतवानी, समीर हंपी, महेश लिमये आणि अनिकेत मराठे यांनी केली आहे. रविंद्र औटी आणि दर्शन शाह हे सहनिर्माते आहेत. महेश लिमये यांनी चित्रपटाचे दिग्दर्शन केले असून, कथा, पटकथा आणि संवादलेखनाची जबाबदारी संकर्षण कऱ्हाडे यांनी सांभाळली आहे.





