पुणे : पुण्यातून एक धक्कादायक घटना समोर आली आहे. बहिणीची छेड काढण्याच्या कारणावरुन गेल्या एक वर्षांपासून सुरु असलेल्या वादात गाडीने कट मारल्याची भर पडली. त्यातून तिघांनी मिळून एका तरुणाच्या डोक्यात फरशीच्या तुकड्याने वार करुन निर्घृण खून केल्याची घटना घडली आहे. ही घटना गुरुवारी (दि. १७) रात्री अकरा वाजण्याच्या सुमारास चंदनगर परिसरात टाटा गार्डनजवळ घडली आहे.

प्रदीप बाबासाहेब अडागळे (वय २२, रा. आभाळवाडी, वाघोली) असं हत्या करण्यात आलेल्या तरुणाचे नाव आहे. याप्रकरणी चंदननगर पोलिसांनी ऋषी काकडे आणि त्याची आई सुनिता काकडे (रा. थिटे वस्ती, खराडी) यांना अटक केली आहे.

पोलिसांनी दिलेल्या माहितीनुसार, ऋषी काकडे याचा भाजीचा व्यवसाय आहे. प्रदीप अडागळे आणि ऋषी काकडे यांच्यात बहिणीची छेड काढल्यावरुन गेल्या एक वर्षांपासून वाद होत होते़. दरम्यान, गाडीने कट मारल्यावरुन गुरुवारी एका अल्पवयीन मुलाबरोबर प्रदीप अडागळे याचा वाद झाला होता. या वादातून चंदननगरमधील टाटा गार्डनजवळ प्रदीप अडागळे याला बोलावून घेतले होते.

त्यावेळी त्यांच्यात झालेल्या वादातून तिघांनी मिळून प्रदीप अडागळे याच्या डोक्यात फरशीच्या तुकड्याने वार करुन त्याला जखमी केले. तातडीने जखमी अवस्थेत प्रदीपला ससून रुग्णालयात दाखल करण्यात आले. त्याच्यावर उपचार सुरु असताना शुक्रवारी सकाळी ७ वाजता त्याचा मृत्यु झाल्याचे डॉक्टरांनी सांगितले. याप्रकरणी चंदननगर पोलिसांनी खुनाचा प्रयत्न केल्याचा गुन्हा दाखल केला होता. त्यात खुनाचे कलम वाढविण्यात आले असून पोलिसांनी दोघांना अटक केली आहे. वरिष्ठ पोलीस निरीक्षक सीमा ढाकणे या घटनेचा अधिक तपास करत आहेत.