सांगली : सांगलीच्या राजकीय वर्तुळातून एक खळबळजनक बातमी समोर आली आहे. राष्ट्रवादी काँग्रेसचे ज्येष्ठ नेते आणि माजी महापौर सुरेश पाटील यांनी आत्महत्येचा प्रयत्न केल्याची माहिती मिळत आहे. या प्रकारामुळे राजकीय वर्तुळात चांगलीच खळबळ उडाली आहे. सुरेश पाटील यांनी राहत्या घरी साडीच्या साह्याने गळफास घेत आत्महत्येचा प्रयत्न केला. या घटनेची माहिती मिळताच त्यांच्या कुटुंबीयांनी त्यांना तातडीने रुग्णालायात दाखल केले असून त्यांची प्रकृती स्थिर असल्याची माहिती आहे. या घटनेची प्राथमिक नोंद विश्रामबाग पोलिस ठाण्यात करण्यात आली आहे. मात्र सुरेश पाटील यांनी टोकाचं पाऊल उचलण्याचा प्रयत्न का केला, याचं कारण अद्याप अस्पष्ट आहे. दरम्यान, सुरेश पाटील हे गेल्या वर्षभरापासून काही कारणास्तव राजकारण आणि सार्वजनिक कार्यक्रमांपासून दूर होते. त्यांच्या संकल्पनेतून सुरु झालेल्या सुरश्री संगीत महोत्सवाच्या उद्घाटनाला गेल्या रविवारी ते उपस्थित होते. त्यानंतर सोमवारी सकाळी त्यांनी सांगलीतील नेमीनाथनगर येथील घरी साडीने गळफास लावून घेण्याचा प्रयत्न केला. सुरेश पाटील यांची राजकीय कारकिर्द सुरेश पाटील हे सांगली महापालिकेचे २००० साली महापौर म्हणून कार्यरत होते. त्यामुळे त्यांना मिलेनियर महापौर म्हणून देखील ओळखले जाते. नगरसेवक ते महापौर आणि खादी ग्रामोद्योग महामंडळाचे अध्यक्ष असा त्यांचा राजकीय प्रवास आहे. सुरेश पाटील हे शरद पवार यांच्या राष्ट्रवादीचे प्रदेशाध्यक्ष जयंत पाटील यांचे निकटवर्तीय मानले जातात. मात्र, राष्ट्रवादी काँग्रेस पक्षात फुट पडल्यानंतर त्यांनी अजित पवार यांच्या गटात प्रवेश करण्याचा निर्णय घेतला होता. त्यानंतर जयंत पाटील यांच्याही भाजप प्रवेशाच्या चर्चांना उधाण आले होते. राष्ट्रवादी काँग्रेसकडून २०१४ मध्ये त्यांनी सांगली विधानसभेची निवडणूक देखील लढवली होती. आयुक्तांचा डोक्यात गोळी झाडून आत्महत्येचा प्रयत्न लातूर महानगरपालिकेचे आयुक्त बाबासाहेब मनोहरे यांनी शनिवारी रात्री डोक्यात गोळी झाडून आत्महत्येचा प्रयत्न केला होता. याप्रकरणात आता एक महत्त्वाची माहिती समोर आली आहे. शनिवारी रात्री बाबासाहेब मनोहरे यांना एक फोन आला होता. या फोनवर बोलल्यानंतर बाबासाहेब मनोहरे यांनी त्यांच्या रूममध्ये जाऊन स्वत:वर गोळी झाडून घेतली, असा दावा त्यांच्या नातेवाईकांनी केला आहे. त्यामुळे हा फोन नक्की कोणाचा होता, याबाबत पोलिसांकडून शोध घेतला जात आहे.
