महाबळेश्वर : महाबळेश्वर तालुक्‍यातील प्रतापगड भागात गुरुवारी तब्बल बारा फूट लांबीचा अजस्र अजगर जखमी अवस्थेत वन विभागाच्या कर्मचाऱ्यांना सापडला. त्यांनी प्राणिमित्रांच्या सहकार्याने या अजगरास पकडले. त्याच्यावर डॉ. जयसिंग सिसोदिया यांनी उपचार केले. या अजगरास
पुन्हा जंगलात सोडून देण्यात येणार असल्याची माहिती वन विभागाच्या अधिकाऱ्यांनी दिली.

वनक्षेत्रपाल महेश झंजुर्णे यांच्या मार्गदर्शनाखाली वन विभागाच्या पथकाने या परिसराला भेट दिली
जंगलात जखमी अवस्थेत हा अजगर दिसला. त्याच्या पाठीवर जखमा झाल्या होत्या. वनरक्षक रोहित लोहार, आशिष पाटील, लहू राऊत, दीपक सोरट, महादेव कट्टे, वनमजूर वागदरे, सह्याद्री प्रोटेक्‍टर्सचे संदेश भिसे, शुभम टेके यांनी हा अजगर पकडून सुरक्षितरित्या हिरडा विश्रामगृहात उपचारासाठी आणले.

पशुवैद्यकीय अधिकारी डॉ. जयसिंग ससोदिया, डॉ. संदीप आरडे यांनी अजगरावर उपचार केले. महाबळेश्वर तालुक्‍यात प्रथमच अजगर आढळला आहे. मादी जातीच्या या अजगराचे वजन 40 किलोहून अधिक असून त्याचे वय अंदाजे सात ते आठ वर्षे असावे.