नेवासा- रशियाची राजधानी मॉस्को येथील ‘मिस रशिया २००८’ चा किताब पटकवणारी सौंदर्यवती वालेरिया स्मिरनोवा आणि तिची मैत्रीण ल्युबोव सिचोवा यांनी हिंदू धर्म व संस्कृतीचा स्वीकार केल्यानंतर, नुकतीच अहिल्यानगर जिल्ह्यातील प्रमुख तीर्थक्षेत्रांना भेट दिली. या भेटीदरम्यान त्यांनी शनिशिंगणापूर, देवगड आणि नेवासा येथे दर्शन घेऊन भारतीय परंपरेचा अनुभव घेतला. विशेष म्हणजे, या दोन्ही युवतींनी २०२४ मध्ये हिंदू धर्म स्वीकारला असून, वालेरिया हिचे नवीन नाव ‘वैष्णोदेवी’ तर ल्युबोव हिचे नाव ‘प्रेमा’ असे ठेवण्यात आले आहे. नेवासा फाटा येथील आत्मदीप हॉस्पिटलचे सीईओ डॉ. अविनाश काळे व ॲड. प्रियांका काळे यांनी या रशियन पाहुण्यांचे स्वागत करून त्यांना तीर्थक्षेत्रांची माहिती दिली. या प्रवासात त्यांनी सर्वप्रथम शनिशिंगणापूर येथे शनिदेवास अभिषेक घातला. त्यानंतर, परिसरात ‘भूलोकीचा स्वर्ग’ मानल्या जाणाऱ्या देवगड येथे भगवान दत्तात्रय व किसनगिरी बाबांच्या समाधीचे दर्शन घेतले. भास्करगिरी बाबांनी त्यांना देवस्थानची माहिती दिली, अनुवाद डॉ. काळे यांनी रशियन भाषेत केला. यानंतर त्यांनी नेवासा येथे संत ज्ञानेश्वर माऊलींच्या पैस खांबाचे दर्शन घेतले. देविदास महाराज म्हस्के यांनी त्यांना ‘ज्ञानेश्वरी’ ग्रंथ भेट देऊन सन्मानित केले. “या पुण्यभूमीतील वास्तव्यामुळे आम्हाला धार्मिक परंपरांची खरी जाणीव झाली,” अशा शब्दांत वैष्णोदेवी (वालेरिया) यांनी आपल्या भावना व्यक्त केल्या. शिर्डी येथे साईबाबांचे दर्शन घेऊन त्या रशियाकडे रवाना झाल्या.
