Rajasthan Local Body Results : काँग्रेसचा दणदणीत विजय! सत्ताधारी भाजपाचा मोठा पराभव; राजस्थानमध्ये काय घडलं?
Rajasthan Local Body Results : या निकालामुळे राजस्थानमध्ये काँग्रेसला पुन्हा राजकीय बळ मिळाल्याचं चित्र निर्माण झालं आहे.

Rajasthan Local Self-Government Election Results 2026 : राजस्थानमधील स्थानिक स्वराज्य संस्थांच्या निवडणुकांमध्ये काँग्रेसने दमदार कामगिरी करत सत्ताधारी भाजपला मोठा धक्का दिला आहे. पंचायत समिती आणि जिल्हा परिषद निवडणुकांमध्ये काँग्रेसने भाजपपेक्षा अधिक जागा जिंकत आपले वर्चस्व सिद्ध केले आहे. या निकालामुळे राजस्थानमध्ये काँग्रेसला पुन्हा राजकीय बळ मिळाल्याचं चित्र निर्माण झालं आहे.
राज्य निवडणूक आयोगाने जाहीर केलेल्या आकडेवारीनुसार, राजस्थानमधील ३७ जिल्ह्यांतील ७,५४३ पंचायत समिती जागांपैकी ७,३९३ जागांचे निकाल जाहीर झाले आहेत. तर १,२७५ जिल्हा परिषद जागांपैकी ९८१ जागांचे निकाल समोर आले आहेत.
पंचायत समिती निवडणुकीत काँग्रेसने ३,७०१ जागांवर विजय मिळवला आहे. तर भाजपला २,१८१ जागांवर समाधान मानावं लागलं. जिल्हा परिषद निवडणुकीतही काँग्रेसने आघाडी कायम ठेवत ५९९ जागा जिंकल्या आहेत. दुसरीकडे भाजपला केवळ ३०१ जागा मिळाल्या आहेत.
राहुल गांधींनी मानले मतदारांचे आभार
या निकालानंतर काँग्रेस नेते आणि लोकसभेतील विरोधी पक्षनेते राहुल गांधी यांनी सोशल मीडियाच्या माध्यमातून मतदारांचे आभार मानले. पंचायत निवडणुकांमध्ये जनतेने काँग्रेसवर दाखवलेला विश्वास ही आमची जबाबदारी असल्याचं त्यांनी म्हटलं. विशेष म्हणजे, ज्या राज्यात भाजपचं सरकार आहे, त्याच राज्यातील जनतेने दिलेला हा कौल म्हणजे ‘डबल इंजिन’ सरकारला दिलेलं थेट उत्तर असल्याची टीकाही त्यांनी केली.
राजस्थान के ग्रामीण भाइयों-बहनों का दिल से धन्यवाद। पंचायत चुनाव में आपने कांग्रेस पर जो भरोसा जताया है, वो अब हमारी ज़िम्मेदारी है।
ये जवाब BJP की अपनी सरकार वाले राज्य से आया है – सीधे “डबल इंजन” को।
BJP ने मनरेगा पर हमला किया, किसान को घाटे में डुबोया, पंचायतों के अधिकार छीने। महंगाई, बेरोज़गारी और पलायन ने गाँव सूने कर दिए।
गाँव सब देख रहा था, सह रहा था। अब उसने बोल दिया है।
ये सिर्फ़ राजस्थान का जनादेश नहीं – देश के हर गाँव की आवाज़ है।
— Rahul Gandhi (@RahulGandhi) November 20, 2026
राजस्थानमधील अनेक महत्त्वाच्या जिल्ह्यांमध्ये काँग्रेसने भाजपपेक्षा अधिक जागा जिंकल्या आहेत. जयपूरमध्ये काँग्रेसने २१६ जागांवर विजय मिळवला, तर भाजपला ८७ जागा मिळाल्या. जोधपूरमध्ये काँग्रेसने १९५, तर भाजपने ८१ जागा जिंकल्या. भीलवाडामध्ये काँग्रेसला १६५, तर भाजपला १११ जागा मिळाल्या.
याशिवाय बिकानेरमध्ये काँग्रेसने १५५ विरुद्ध ६५, दौसामध्ये १३५ विरुद्ध ५९ आणि सीकरमध्ये १७९ विरुद्ध ८७ अशा फरकाने भाजपला मागे टाकलं. पश्चिम राजस्थानमधील बाडमेर, जैसलमेर आणि राजसमंद या जिल्ह्यांमध्येही काँग्रेसने आघाडी मिळवली आहे.
बाडमेरमध्ये काँग्रेसने १२०, तर भाजपने ६२ जागा जिंकल्या. जैसलमेरमध्ये काँग्रेसला ८९ आणि भाजपला ३६ जागा मिळाल्या. तर राजसमंदमध्ये काँग्रेसने ९७ आणि भाजपने ५८ जागांवर विजय मिळवला.
जिल्हा परिषद निवडणुकीत ३७ पैकी २४ जिल्ह्यांमध्ये काँग्रेसचे संख्याबळ भाजपपेक्षा अधिक राहिले आहे. मात्र, अजमेर, ब्यावर, डूंगरपूर, झालावाड, पाली आणि उदयपूर या सहा जिल्ह्यांमध्ये भाजपने आघाडी घेतली आहे.
पंचायत समितीच्या काही जागांवरही भाजपने काँग्रेसला मागे टाकलं आहे. अजमेरमध्ये भाजपने ८३, तर काँग्रेसने ८० जागा जिंकल्या. बालोतरामध्ये भाजपला ६३, तर काँग्रेसला ५७ जागा मिळाल्या. सलूंबरमध्ये भाजपने ३८ विरुद्ध ३२ अशा फरकाने आघाडी घेतली. उदयपूरमध्येही भाजपने १४६, तर काँग्रेसने १३७ जागा जिंकल्या.
Kolhapur : शाहाळ्याच्या नारळांचा कल्पक पुनर्वापर; तुळशी विवाहानिमित्त १०० रोपांचे मोफत वाटप





