Ranveer Singh : बॉलिवूडचा एनर्जेटिक अभिनेता रणवीर सिंग याच्या कुटुंबावर दुःखाचा डोंगर कोसळला आहे. दिवाळीचा सण, घरात लक्ष्मीपूजनाची लगबग आणि सर्वत्र आनंदाचे वातावरण असतानाच रणवीरच्या कुटुंबावर दुःखाची छाया पसरली. अभिनेत्याचे आईकडील आजोबा डॉ. राम हिंगोरानी यांचे वयाच्या ९६व्या वर्षी निधन झाले.

विशेष म्हणजे, ८ नोव्हेंबर रोजी दिवाळीच्या दिवशी लक्ष्मीपूजन सुरू असतानाच त्यांनी अखेरचा श्वास घेतला. त्यांच्या निधनाची बातमी समोर येताच चाहत्यांकडून हळहळ व्यक्त केली जात आहे. मात्र, या दुःखाच्या प्रसंगी रणवीरच्या चुलत बहिणीने केलेली भावनिक पोस्ट आणि आजोबांसोबतच्या जुन्या आठवणींनी अनेकांचे लक्ष वेधून घेतले आहे.

रणवीरची चुलत बहीण सौम्या हिंगोरानी ठाकरे हिने सोशल मीडियावर आजोबा डॉ. राम हिंगोरानी यांच्यासोबतचे काही खास फोटो आणि व्हिडीओ शेअर करत त्यांच्या निधनाची माहिती दिली. या पोस्टमध्ये तिने आजोबांच्या ९६ वर्षांच्या आयुष्याचा गौरव करत त्यांच्या आठवणींना उजाळा दिला.

सौम्याने लिहिले की, ९६ वर्षांचे आयुष्य म्हणजे आनंदाने साजरे करण्यासारखा प्रवास आहे. माझे दादू डॉ. राम दिवाळीच्या दिवशी शांतपणे आम्हाला सोडून आजीकडे निघून गेले. यापेक्षा शुभ वेळ त्यांनी निवडली नसती. लक्ष्मीपूजन सुरू असताना दिवसाच्या सर्वात सुंदर क्षणी त्यांनी अखेरचा श्वास घेतला. मला खात्री आहे की, ते दोघेही आता त्यांच्या आवडत्या खुर्च्यांवर बसून व्हिस्कीचे घोट घेत असतील आणि एकत्र बसून आम्हाला पाहत असतील.

पुढे तिने आजोबांचे आभार मानताना लिहिले, ‘जगातील सर्वात उत्तम आजोबा असल्याबद्दल धन्यवाद. आम्हाला सगळं काही दिल्याबद्दल धन्यवाद. माझ्यासाठी आईस्क्रीमचा एक स्कूप बाजूला ठेवून ठेवा. पुन्हा कधीतरी आपण एकत्र डान्स करू. हरि ओम.’ सौम्याच्या या शब्दांतून आजोबांबद्दलचे प्रेम आणि त्यांच्याशी असलेले घट्ट नाते स्पष्टपणे जाणवते.

रणवीरसोबत केला होता भन्नाट डान्स!

रणवीर सिंग आणि त्याच्या आजोबांचे नाते केवळ कुटुंबापुरते मर्यादित नव्हते, तर दोघांमध्ये मैत्रीपूर्ण आणि जिव्हाळ्याचे नाते होते. रणवीर अनेकदा सोशल मीडियावर आजोबांसोबतचे फोटो आणि व्हिडीओ शेअर करत असे. विशेष म्हणजे, वयाच्या ९३व्या वर्षीही डॉ. राम हिंगोरानी यांचा उत्साह तरुणांना लाजवेल असाच होता.

२०२३ मध्ये ‘रॉकी और रानी की प्रेम कहानी’ या चित्रपटाच्या प्रमोशनदरम्यान रणवीरने आजोबांसोबतचा एक खास व्हिडीओ शेअर केला होता. यामध्ये दोघेही चित्रपटातील ‘व्हॉट झुमका?’ या गाण्यावर ठेका धरताना दिसले होते. आजोबांनी ‘टीम रॉकी’ लिहिलेला टी-शर्टही परिधान केला होता. एवढेच नाही, तर व्हिडीओमध्ये त्यांनी ‘टिक्की सोडा, टकीला आणा!’ असे म्हणत आपल्या खट्याळ स्वभावाची झलकही दाखवली होती.

या व्हिडीओसोबत रणवीरने आजोबांचे कौतुक करत त्यांना ‘रॉकस्टार नाना’ असे संबोधले होते. ९३व्या वर्षीही त्यांचा हा उत्साह पाहून चाहत्यांनी त्यांच्यावर कौतुकाचा वर्षाव केला होता.

रणवीरची जुनी पोस्टही चर्चेत; आजोबांच्या आठवणींना उजाळा

ऑगस्ट २०२० मध्येही रणवीरने आजोबांचा एक खास फोटो सोशल मीडियावर शेअर केला होता. डोक्यावर कॅप, डोळ्यांवर मोठा चष्मा आणि गळ्यात सोन्याची चेन अशा हटके अंदाजातील आजोबांचा फोटो त्याने ‘नानाजी’ या कॅप्शनसह पोस्ट केला होता.