Surbhi Jyoti: छोट्या पडद्यावरील लोकप्रिय अभिनेत्री सुरभी ज्योती  (Surbhi Jyoti ) सध्या आयुष्यातील नव्या आणि सुंदर टप्प्याचा आनंद घेत आहे. आई झाल्यानंतरचा प्रत्येक क्षण ती मनापासून अनुभवत असून, तिच्या चाहत्यांनाही तिच्या लेकीची पहिली झलक पाहण्याची आणि नाव जाणून घेण्याची उत्सुकता होती. अखेर मुलीच्या जन्मानंतर एक महिना पूर्ण झाल्यानंतर सुरभीने चाहत्यांची ही प्रतीक्षा संपवली आहे.

सुरभी ज्योतीने सोशल मीडियावर आपल्या मुलीची पहिली झलक शेअर केली आहे. तिने इंस्टाग्रामवर अतिशय भावूक पोस्ट करत लेकीच्या छोट्याशा हातांचा फोटो पोस्ट केला. याशिवाय इंस्टाग्राम स्टोरीमध्ये तिने मुलीच्या छोट्या पावलांचीही झलक दाखवली. या गोंडस फोटोंनी सोशल मीडियावर चाहत्यांची मनं जिंकली असून, पोस्टवर शुभेच्छांचा वर्षाव होत आहे.

या पोस्टसोबत सुरभीने आपल्या मुलीच्या नावाचाही खुलासा केला. सुरभी आणि तिचा पती सुमित सूरी यांनी आपल्या लेकीचं नाव ‘सहर’ असं ठेवलं आहे. हे नाव जितकं वेगळं आणि सुंदर आहे, तितकाच त्याचा अर्थही खास आहे.  (Surbhi Jyoti)

‘सहर’ या नावाचा अर्थ पहाटेची पहिली किरण, नव्या दिवसाची सुरुवात किंवा उषःकाल असा होतो. सुरभीने पोस्टमध्ये लिहिले की, जशी सकाळची पहिली किरण संपूर्ण जग उजळून टाकते, तशीच त्यांच्या मुलीच्या आगमनामुळे त्यांचे आयुष्य आनंदाने आणि प्रकाशाने भरून गेले आहे. तिच्या या भावनिक संदेशाने चाहत्यांची मनं जिंकली आहेत.   (Surbhi Jyoti)

सुरभीच्या या पोस्टनंतर सोशल मीडियावर चाहत्यांकडून भरभरून प्रेम व्यक्त करण्यात येत आहे. अनेकांनी ‘सहर’ हे नाव अतिशय सुंदर आणि अर्थपूर्ण असल्याचे म्हटले आहे. अनेक चाहत्यांनी या चिमुकलीसाठी यापेक्षा सुंदर नाव असूच शकत नाही, अशा प्रतिक्रिया दिल्या आहेत.

केवळ चाहतेच नव्हे, तर टेलिव्हिजन विश्वातील अनेक कलाकारांनीही सुरभीच्या पोस्टवर शुभेच्छांचा वर्षाव केला आहे. कलर्स टीव्हीनेही खास कमेंट करत या नव्या प्रवासासाठी शुभेच्छा दिल्या. अभिनेत्री आरती सिंह आणि अनीता हसनंदानी यांनीही रेड हार्ट इमोजी शेअर करत चिमुकलीवर प्रेमाचा वर्षाव केला.  (Surbhi Jyoti)

सुरभी ज्योती आणि सुमित सूरी यांनी यावर्षी १३ जून रोजी आपल्या पहिल्या अपत्याचे स्वागत केले. मुलीच्या जन्मानंतर दुसऱ्याच दिवशी या दोघांनी एक सुंदर पेस्टल थीममधील डिजिटल कार्ड सोशल मीडियावर शेअर केले होते. त्या कार्डमध्ये त्यांनी, “आमच्या घरी मुलीचं आगमन झालं आहे. आमचं मन कृतज्ञता आणि अमाप प्रेमाने भरून गेलं आहे,” असा भावनिक संदेश लिहिला होता. ( Surbhi Jyoti)

लग्नानंतर दोन वर्षांनी त्यांच्या घरी चिमुकलीचे आगमन झाल्याने त्यांच्या कुटुंबात आनंदाचे वातावरण आहे. आता मुलीच्या पहिल्या झलक आणि नावाच्या घोषणेमुळे चाहत्यांचाही आनंद द्विगुणित झाला आहे. सुरभीच्या या पोस्टवर हजारो लाईक्स आणि कमेंट्स येत असून, सोशल मीडियावर ‘सहर’ या नावाचीही मोठी चर्चा रंगली आहे.

सध्या सुरभी ज्योती तिच्या मातृत्वाचा प्रत्येक क्षण आनंदाने जगत असून, तिच्या या गोड पोस्टने चाहत्यांच्या चेहऱ्यावरही हसू फुलवले आहे.