प्रभात वृत्तसेवा पिंपरी – पिंपरी-चिंचवड शहरात शिवसेनेला आणखी एक मोठा राजकीय हादरा बसला आहे. शिवसेनेचे खंदे शिलेदार व माजी नगरसेवक धनंजय आल्हाट यांनी शिवसेनेला जय महाराष्ट्र करत राष्ट्रवादी काँग्रेस (अजित पवार गट) मध्ये प्रवेश केला. सोबतच शिवसेना (उद्धव बाळासाहेब ठाकरे गट) चे उपशहर प्रमुख राहुल बाळासाहेब गवळी आणि शिवसेना उद्धव बाळासाहेब ठाकरे पक्षाचे भोसरी उपशहर प्रमुख ॲड. कुणाल किसन तापकीर यांनी महाराष्ट्राचे उपमुख्यमंत्री अजित पवार यांच्या उपस्थितीत राष्ट्रवादी काँग्रेस पक्षात प्रवेश केला. चिखली येथे झालेल्या उपमुख्यमंत्री अजित पवार यांच्या जाहीर सभेत हा पक्षप्रवेश झाला. यामुळे शहारतील प्रभाग क्रमांक ३ चे राजकीय गणित पूर्णपणे बदलणार आहे. विशेष म्हणजे काही दिवसांपूर्वी याच प्रभागातून राष्ट्रवादीच्या विनया तापकीर व प्रदीप तापकीर यांनी भाजपमध्ये प्रवेश केल्याने भाजपने प्रभागावर दावा सांगण्याचा प्रयत्न केला होता. मात्र, राष्ट्रवादीने याठिकाणाहून शिवसेनेचे इच्छुक गळाला लावत प्रवेश घडवून आणला.दरम्यान, चऱ्होली भागातील शिवसेना (उबाठा) गोटात अस्वस्थता निर्माण केली आहे. सलग होणारे पक्षप्रवेश, नेतृत्वाची ओहोटी आणि कार्यकर्त्यांची गळती यामुळे शिवसेनेचा या भागातील गडाला भगदाड पडले आहे.
