Sahab Singh Saini : आगामी विधानसभा निवडणुकीच्या पार्श्वभूमीवर उत्तर प्रदेश राज्यात मोठ्या राजकीय घडामोडींना वेग आला आहे. भाजपमधून अनेक बडे नेत्यांनी पक्षाची साथ सोडली आहे. आता एक मोठी बातमी समोर आली आहे. भाजपमधील ज्येष्ठ नेते आणि माजी मंत्री साहब सिंह सैनी यांनी पक्षाला रामराम ठोकत साथ सोडण्याची घोषणा केली आहे. त्यांच्या या घोषणेमुळे आगामी काळातील राजकीय समीकरणे बदलणार आहेत. ते समाजवादी पार्टीत पक्षप्रवेश करणार आहेत. सैनी यांच्या या निर्णयामुळे भाजपला मोठा झटका बसला आहे.

मिळालेल्या माहितीनुसार, साहब सैनी आपल्या शेकडो समर्थकांसह अखिलेश यादव यांच्या प्रमुख उपस्थितीत समाजवादी पक्षात प्रवेश करणार आहेत. नकुड विधानसभेची निवडणूक लढण्यासाठी साहब सैनी इच्छूक आहेत. त्यामुळे त्यांना या मतदार संघातून समाजवादी पक्षाकडून उमेदवारी मिळणार असल्याची जोरदार चर्चा आहे. मात्र, पक्षाकडून अद्याप याबाबत कोणताही निर्णय घेण्यात आलेला  नाही. याचे कारण म्हणजे जागावाटपाचा फॅार्म्युला कसा ठरतो यावर सगळी गणितं अवलंबून असणार आहेत.

माजी खासदारानेही सोडली साथ

विधानसभा निवडणुकीआधी बरेलीमध्येही मोठा राजकीय भूंकप झाला आहे. भाजपचे माजी खासदार धर्मेंद्र कश्यप आणि त्यांची मुलगी कीर्ति कश्यप यांनी समाजवादी पक्षात प्रवेश केला. दोन्ही बाप-लेकीने समाजवादी पक्षाचे अध्यक्ष, माजी मुख्यमंत्री अखिलेश यादव यांच्या उपस्थितीत प्रवेश केला. त्यामुळे आगामी काळात अजून मोठे पक्षप्रवेश होतील अशी दबक्या आवाजात चर्चा राजकीय वर्तुळात सुरू आहे.

कोण आहेत साहब सिंह सैनी? 

उत्तर प्रदेशातील एक ज्येष्ठ राजकीय नेते आणि माजी कॅबिनेट मंत्री आहेत. ते प्रामुख्याने पश्चिम उत्तर प्रदेशातील राजकारणात सक्रिय असून सैनी समाजाचे मोठे नेते मानले जातात. साहब सिंह सैनी यांनी प्रदीर्घ काळ समाजवादी पक्षात घालवला असून ते अखिलेश यादव यांच्या जवळचे मानले जात होते. मात्र, पक्षातील अंतर्गत घडामोडींमुळे नाराज होत त्यांनी भाजपमध्ये प्रवेश केला होता.

ते उत्तर प्रदेश सरकारमध्ये माजी कॅबिनेट मंत्री राहिले आहेत. तसेच उत्तर प्रदेश विधान परिषदेचे सदस्य म्हणूनही त्यांनी काम केले आहे. उत्तर प्रदेशातील सहारनपूर जिल्हा आणि नकुड विधानसभा मतदारसंघाच्या परिसरात त्यांचा मोठा राजकीय दबदबा आहे.

Bhor : भूस्खलनात झालेल्या नुकसानीच्या भरपाईची मागणी