Walmik Karad | मस्साजोगचे सरपंच संतोष देशमुख यांच्या हत्या प्रकरणातील आरोपी वाल्मिक कराड सध्या तुरुंगात आहे. वाल्मिक कराड हा धनंजय मुंडे यांचा निकटवर्तीय मानला जातो. ज्यामुळे मुंडेंना मंत्रीपदही गमावावं लागलं. यातच आता कराडच्या नावाने सोशल मीडियावर आर्थिक निधी गोळा करण्याचे बॅनर सध्या मोठ्या प्रमाणावर व्हायरल होत आहेत. या बॅनरमध्ये मुंडे बंधू भगिनींचे फोटो झळकले असून, संबंधित प्रकारामुळे राजकीय आणि सामाजिक वर्तुळात एकच खळबळ उडाली आहे. वाल्मिक कराड याचे पोस्टर काही दिवसांपूर्वी पंकजा मुंडे यांच्या दसरा मेळाव्यात झळकले होते. त्यानंतर आता वाल्मिक कराडच्या नावाने आता संघटना आणि मित्रमंडळ स्थापन झाले असून थेट कराडच्या आर्थिक मदतीसाठी सोशल मीडियावर आवाहन करण्यात आले आहे. बॅनरवरील नेमका मजकूर काय? “वाल्मीक (अण्णा) कराड संघटना मित्र मंडळ मजबूत करण्यासाठी तसेच सोशल मीडियावरही वाल्मीक अण्णांचे नाव व चेहरा सातत्याने टिकून राहण्यासाठी आपले आर्थिक सहाय्य फार महत्त्वाचे आहे. फुल ना फुलाची पाकळी दान करून मदत करा. तेव्हाच अण्णा आपल्यामध्ये एक दिवस येतील… थोडीशी मदत… अण्णासाठी… आपल्या स्वाभिमानासाठी,” असा मजूकर या बॅनरवर लिहिण्यात आला आहे. या बॅनरमध्ये फोनपे QR कोड देखील देण्यात आले असून, तो संदीप गोरख तांदळे या व्यक्तीच्या बँक खात्याशी संलग्न असल्याचे उघड झाले आहे. या बॅनरद्वारे वाल्मीक कराडसाठी निधी गोळा करण्याचे उघड आवाहन करण्यात आले आहे. Walmik Karad | बॅनरवर कोणाचे फोटो? सोशल मीडियात व्हायरल होत असलेल्या या बॅनरवर डावीकडून भगवानबाबा, त्याशेजारी भगवानगडाचे महंत नामदेवशास्त्री, यानंतर दिवंगत भाजप नेते गोपीनाथ मुंडे आणि त्याशेजारी धनंजय मुंडे यांचे फोटो लावण्यात आले आहेत. दरम्यान, याप्रकरणी अनेकांकडून संताप व्यक्त केला जात आहे. Walmik Karad | गंभीर गुन्ह्यातील आरोपीसाठी अशाप्रकारे निधी गोळा केला जात असल्याने बीड जिल्ह्यात पुन्हा खळबळ उडाली आहे. याबाबत सखोल चौकशी करून संबंधितांवर तातडीने कारवाई करावी, अशी मागणी करण्यात आली आहे. या प्रकरणी अमळनेर पोलिस ठाण्यात तक्रार दाखल करण्यात आली असून याचा तपास केला जात आहे. Walmik Karad | हेही वाचा: कटकमध्ये गोंधळ! अनेक भागात इंटरनेट सेवांसह कर्फ्यू लागू ; शहरात का दिला हाय अलर्ट?, नेमकं काय कारण
