Samantha Ruth Prabhu: दक्षिण भारतीय चित्रपटसृष्टीतील लोकप्रिय अभिनेत्री समंथा रुथ प्रभू हिच्याबाबत गेल्या काही महिन्यांपासून सुरू असलेल्या चर्चांना अखेर पूर्णविराम मिळाला आहे. अभिनेत्री लवकरच आई होणार असल्याची माहिती समोर आली असून तिच्या चाहत्यांमध्ये आनंदाचे वातावरण निर्माण झाले आहे. अनेक दिवसांपासून सोशल मीडियावर तिच्या प्रेग्नन्सीबाबत विविध चर्चा सुरू होत्या. आता या वृत्ताला तिच्या नव्या चित्रपटाच्या दिग्दर्शिकेने दुजोरा दिल्याचे सांगितले जात आहे.

डिसेंबर २०२५ मध्ये प्रसिद्ध दिग्दर्शक राज निदिमोरू यांच्याशी विवाहबंधनात अडकल्यानंतर समंथा आणि राज त्यांच्या आयुष्यातील नव्या टप्प्याची तयारी करत आहेत. हे दोघे त्यांच्या पहिल्या बाळाचे स्वागत करण्यासाठी उत्सुक असल्याचे वृत्त समोर आले आहे.

अलीकडेच समंथाच्या ‘मा इंटी बंगारम’ या चित्रपटाच्या यशस्वी प्रदर्शनानिमित्त आयोजित कार्यक्रमातील काही व्हिडिओ सोशल मीडियावर मोठ्या प्रमाणात व्हायरल झाले. या कार्यक्रमात सामंथा आणि तिचे पती राज निदिमोरू एकत्र दिसले. यावेळी चाहत्यांचे लक्ष सामंथाच्या बदललेल्या लूककडे गेले. काही व्हिडिओंमध्ये तिचा बेबी बंप दिसत असल्याचा दावा करण्यात आला आणि त्यानंतर या चर्चांना आणखी वेग आला.

या संपूर्ण प्रकरणावर ‘मा इंटी बंगारम’ या चित्रपटाच्या दिग्दर्शिका बी. व्ही. नंदिनी रेड्डी यांनी एका मुलाखतीत भाष्य केले. त्यांनी सामंथाच्या आयुष्यातील हा अत्यंत आनंदाचा क्षण असल्याचे सांगितले. त्याचबरोबर अभिनेत्रीच्या आयुष्यात एकाच वेळी दोन मोठ्या आनंदाच्या घटना घडत असल्याचेही त्यांनी नमूद केले.

 

View this post on Instagram

 

एका बाजूला तिचा चित्रपट प्रेक्षकांकडून चांगला प्रतिसाद मिळवत आहे, तर दुसऱ्या बाजूला तिच्या वैयक्तिक आयुष्यात मातृत्वाचा आनंद येणार आहे. नंदिनी रेड्डी यांनी सांगितले की, या विषयावर कोणतीही अधिकृत घोषणा न करण्याचा निर्णय हा सामंथाचा वैयक्तिक निर्णय आहे आणि त्याचा आदर केला पाहिजे.

दरम्यान, ‘मा इंटी बंगारम’ हा चित्रपट बॉक्स ऑफिसवरही दमदार कामगिरी करत आहे. १९ जून रोजी प्रदर्शित झालेल्या या चित्रपटाने अवघ्या तीन दिवसांत २३.१० कोटी रुपयांची कमाई केल्याचे सांगितले जात आहे. पहिल्याच आठवड्यात चित्रपटाला प्रेक्षकांचा मोठा प्रतिसाद मिळाला आहे.

शनिवारी चित्रपटाने सुमारे ७.६५ कोटी रुपयांचा व्यवसाय केला होता. त्यानंतर रविवारी कमाईत जवळपास ३२ टक्क्यांची वाढ झाली. रविवारी एकट्या दिवसात चित्रपटाने १०.१० कोटी रुपयांहून अधिक कमाई केली. तसेच थिएटरमधील प्रेक्षकांची उपस्थितीदेखील वाढल्याचे दिसून आले.

Samantha Ruth Prabhu

समंथा रुथ प्रभू ही दक्षिण चित्रपटसृष्टीतील अत्यंत लोकप्रिय अभिनेत्रींपैकी एक मानली जाते. अभिनयासोबतच तिच्या वैयक्तिक आयुष्याविषयी चाहत्यांना नेहमीच उत्सुकता असते. त्यामुळे तिच्या मातृत्वाच्या बातमीने सोशल मीडियावर शुभेच्छांचा वर्षाव सुरू झाला आहे.

तथापि, समंथा किंवा तिच्या कुटुंबीयांकडून अधिकृत निवेदन येणे अद्याप बाकी आहे. त्यामुळे चाहत्यांना आता त्यांच्या अधिकृत घोषणेची प्रतीक्षा लागली आहे. पण या बातमीमुळे अभिनेत्रीच्या चाहत्यांमध्ये उत्साह आणि आनंदाचे वातावरण निर्माण झाले आहे.