Swapnil Rajashekhar : “शंभर प्रवासी, पण एकही मदतीला धावला नाही;” मयंकच्या मृत्यूप्रकणी मराठी अभिनेत्याचा संताप
Swapnil Rajashekhar : या प्रकरणावर आता मराठी अभिनेते स्वप्नील राजशेखर यांनीही संतप्त प्रतिक्रिया दिली आहे.
Swapnil Rajashekhar : मुंबई लोकलमधील २२ वर्षीय मयंक लोहारच्या निर्घृण हत्येने महाराष्ट्र हादरला आहे. धावत्या ट्रेनमध्ये पावसाचे पाणी आत येत असल्याने दरवाजा बंद करण्यावरून झालेल्या किरकोळ वादाचे रूपांतर थेट हत्येत झाले. या घटनेनंतर विरारमधील लोहार कुटुंबावर दुःखाचा डोंगर कोसळला असून समाजातूनही संताप व्यक्त होत आहे. या प्रकरणावर आता मराठी अभिनेते स्वप्नील राजशेखर यांनीही संतप्त प्रतिक्रिया दिली आहे.
सोशल मीडियावर पोस्ट शेअर करत स्वप्नील यांनी घटनेवेळी डब्यात उपस्थित असलेल्या प्रवाशांच्या भूमिकेवर प्रश्नचिन्ह उपस्थित केले. “रेल्वेच्या डब्यात किमान शंभर प्रवासी होते. घटनेचे व्हिडिओ समोर आले, पण कुणीही मयंकच्या मदतीला धावून गेले नाही किंवा हल्लेखोराला रोखण्याचा प्रयत्न केला नाही. ही बाब तितकीच गंभीर आहे.” असे त्यांनी म्हटले.
या पोस्टवर अनेकांनी कमेंट करत त्यांची मतं व्यक्त केली आहेत. तर स्वप्नील यांनी या घटनेवरुन काही सवालही उपस्थित केले आहेत. तो गुन्हेगार डब्यातुन उतरुन गर्दीतुन सरळ चालत स्टेशनबाहेर गेला… मग तो त्याच्या ईच्छित स्थळी पोहोचला. तिथुन मध्यप्रदेशात की कुठे पळुन जाण्याच्या तयारीत असताना १२ तासांनी पोलिसांनी त्याला शोधुन पकडलं… पोलिसांनी तत्परता दाखवली नसती तर तो पळुन सुध्दा गेला असता…असे म्हटलं आहे.
हेही वाचा : Arjun Kapoor: 150 किलो वजन, नैराश्य ते बॉलिवूड स्टार; अर्जुन कपूरचा प्रेरणादायी संघर्ष
तसेच पुढे ते म्हणाले, बाकी हिरोगीरी राहु दे, पण ज्या रेल्वे डब्यात हा खुन पडला त्या डब्यातल्या लोकांनी तो डब्याबाहेर पडल्यावर आरडाओरडा का केला नसेल ? बाहेरच्या लोकांना का सांगीतलं नाही की “तो खुनी चालला आहे, त्याला आडवा…” गदारोळ झाला असता तरी रेल्वे पोलिसांनी तिथेच त्याला पकडलं असतं….बाकी त्यानी मयंकला मदत केली नाही, खुन्याला वार करताना अडवलं नाही, त्याला पकडलं नाही सगळं मान्य!! एवढंही का केलं नसेल ?!!! असे सवाल त्यांनी उपस्थित केले आहेत.
पसार होण्याच्या तयारीत पण…
दरम्यान, पोलिसांनी सीसीटीव्हीच्या माध्यमातून आरोपीचा शोध घेत त्याला अटक केली. रोशन सुवर्णा असं या आरोपीचं नाव आहे. रेल्वे पोलिसांनी अवघ्या १५ तासांच्या आत आरोपीला पनवेलमधून ताब्यात घेतले. दरम्यान, आरोपी रोशन सुवर्णा हा त्याच्या मूळगावी, कर्नाटकातील मंगळुरूला पळून जायच्या तयारीत होता. ही माहिती पोलिसांना मिळताच त्यांनी जाळे लावले आणि त्याला पनवेलमधून अटक केली.
