Operation Tiger : महाराष्ट्राच्या राजकारणात चर्चेत असलेल्या ‘ऑपरेशन टायगर’ला ऐनवेळी अडथळा आल्याची चर्चा राजकीय वर्तुळात रंगली आहे. शिवसेना (उद्धव बाळासाहेब ठाकरे) पक्षातील काही खासदार शिंदे गटात जाणार असल्याच्या चर्चांदरम्यान दोन खासदारांच्या भूमिकेमुळे पुढील प्रक्रिया थांबली असल्याचा दावा सूत्रांकडून केला जात आहे. मात्र, या घडामोडींना अद्याप अधिकृत दुजोरा मिळालेला नाही. (Operation Tiger)

सूत्रांच्या माहितीनुसार, खासदार संजय दिना पाटील आणि ओमरा  निंबाळकर यांच्या सह्या आवश्यक कागदपत्रांवर झालेल्या नसल्याने प्रस्तावित हालचालींना विलंब झाला आहे. या दोन्ही खासदारांच्या भूमिकेकडे आता सर्वांचे लक्ष लागले आहे. (Operation Tiger)

ओमराजे निंबाळकर यांची प्रतिक्रिया

ओमराजे निंबाळकर यांनी आपण सध्या पुण्यात असल्याचे सांगितले आहे. तसेच 20 तारखेनंतर आपली भूमिका स्पष्ट करणार असल्याचे त्यांनी माध्यमांशी बोलताना म्हटले. मुलाची तब्येत ठीक नसल्याने पुण्यातच थांबल्याचेही त्यांनी स्पष्ट केले. (Operation Tiger)

ठाकरे गटाची बैठक, व्हीप जारी

दरम्यान, संभाव्य पक्षफुटीच्या पार्श्वभूमीवर ठाकरे गटाने कायदेशीर तयारी सुरू केली आहे. पक्षाच्या संसदीय दलाची तातडीची बैठक बोलावण्यात आली असून ती सकाळी 11 वाजता होणार आहे. या बैठकीसाठी सर्व खासदारांना व्हीप जारी करण्यात आला आहे. बैठकीला गैरहजर राहणाऱ्या खासदारांवर कायदेशीर कारवाई करण्याचा इशाराही पक्षाकडून देण्यात आल्याचे सांगितले जात आहे. (Operation Tiger)

सूत्रांच्या माहितीनुसार, काही खासदारांशी दोन्ही बाजूंनी संपर्क सुरू असून त्यांची मनधरणी करण्याचे प्रयत्न सुरू आहेत. तसेच आगामी राजकीय समीकरणांच्या दृष्टीने काही खासदारांनी अद्याप अंतिम निर्णय घेतलेला नसल्याचीही चर्चा आहे. त्यामुळे या सर्व घडामोडींकडे राजकीय वर्तुळाचे लक्ष लागले आहे. (Operation Tiger)