Aashna roy – नवी दिल्लीतील एका पंचतारांकित हॉटेलमध्ये बॅड हेअरकट केल्याने महिला संतापली होती. तिने हॉटेलविरोधात कोर्टात दावा केला आणि २ कोटी रुपयांची नुकसान भरपाई देण्याची मागणी केली होती. सदर महिलेने सात वर्षे लढा दिला. ज्यानंतर आता सर्वोच्च न्यायालयाने या प्रकरणी हॉटेलला २५ लाख रुपयांची भरपाई देण्याचे आदेश दिले आहेत. आशना रॉय असे या महिलेचे नाव आहे. न्यायालयाने या प्रकरणात आयटीसी मोर्या या दिल्लीतल्या हॉटेलला सदर महिलेला २५ लाख रुपयांची भरपाई देण्याचे आदेश दिले आहेत. आशना रॉय नावाच्या महिलेने २०१८ मध्ये एक याचिका दाखल केली होती. आशना रॉय ही एक मॉडेल आहे. तिने सांगितले की आयटीसी मोर्या हॉटेलमध्ये तिचा हेअरकट चुकीच्या पद्धतीने करण्यात आला. याची भरपाई म्हणून मला २ कोटी रुपये मिळावेत. राष्ट्रीय ग्राहक तंटामुक्त आयोगाकडेही तिने धाव घेतली होती. प्रकरण सात वर्षे चालले. या प्रकरणी सर्वोच्च न्यायालयाने राष्ट्रीय ग्राहक तक्रार निवारण आयोगाचा निर्णय बदलला. न्या. राजेश बिंदल आणि न्या. मनमोहन यांच्या बेंचने हा निर्णय दिला. न्यायालयाने म्हटले की, आशना रॉय या मॉडेलने एका हेअरकटमुळे तिचे करिअर उद्ध्वस्त झाले, हे म्हटले होते. पण तिला हे सिद्ध करता आलेले नाही. तिच्या वकिलांनी केलेले दावे पोकळ ठरले. त्यामुळे भरपाईची रक्कम दोन कोटी रुपये नाही तर २५ लाख रुपये असणार आहे. न्यायालयाने हेदेखील सांगितले की नुकसान झाले आहे, वाईट हेअरकट आहे हे दाखवण्यासाठी आशना रॉय यांच्या वतीने जे पुरावे सादर केले त्यात काही ई मेल आणि फोटो कॉपी आहेत. कोट्यवधी रुपयांची भरपाई मागत असल्यास तसे ठोस पुरावे आणा. शिवाय तपासात हे देखील आढळून आले आहे की जी कागदपत्रं सादर करण्यात आली ती हेअरकटच्या दिवसाच्या आधीची होती. या घटनेशी त्या कागदपत्रांचा काहीच संबंध नव्हता. त्यामुळे भरपाईची रक्कम २५ लाख करण्यात आली.
