जामखेड : नगद नारायण गडाच्या ७५ व्या अमृत महोत्सवानिमित्त जामखेड तालुक्यातील पिंपळगाव उंडा येथील ग्रामस्थांनी धार्मिक कार्यासाठी मोठे योगदान दिले आहे. नगद नारायण गडासाठी ग्रामस्थांच्या सहकार्याने २१ लाख रुपयांची देणगी जमा करण्यात आली असून, ही देणगी नगद नारायण गडाचे महंत शिवमूर्ती शिवाजी महाराज यांच्याकडे सुपूर्द करण्यात आली. महंत शिवाजी महाराज हे पिंपळगाव उंडा येथे भेटीसाठी आले असता हा देणगी सुपूर्द करण्याचा कार्यक्रम पार पडला.

नगद नारायण गडावर ७५ वा अमृत महोत्सव साजरा करण्यात येत आहे. याच पार्श्वभूमीवर पिंपळगाव उंडा येथेही नारळी सप्ताहाचे आयोजन करण्यात येत असते. या धार्मिक सोहळ्याच्या अनुषंगाने नगद नारायण गडाच्या कार्यासाठी गावातील ग्रामस्थांच्या सहकार्याने ११ लाख रुपयांची देणगी देण्याचा संकल्प जाहीर करण्यात आला होता. मात्र, ग्रामस्थांनी उत्स्फूर्त प्रतिसाद देत अपेक्षेपेक्षा अधिक आर्थिक सहकार्य केले. त्यामुळे ११ लाख रुपयांचे उद्दिष्ट पार करत तब्बल २१ लाख रुपयांची देणगी जमा झाली. ग्रामस्थांच्या एकजुटीचे आणि धार्मिक कार्याप्रती असलेल्या श्रद्धेचे हे उल्लेखनीय उदाहरण मानले जात आहे.

दरम्यान, पिंपळगाव उंडा गावात छत्रपती शिवाजी महाराज यांचा भव्य पुतळा उभारण्यात येणार आहे. गावातील उद्योगपती दत्तात्रय मारुती मोरे यांनी हा पुतळा स्वखर्चाने उभारून देण्याचा पुढाकार घेतला आहे. या पुतळ्याच्या उभारणीसाठी आवश्यक असलेल्या कामाचे भूमिपूजन नगद नारायण गडाचे महंत शिवमूर्ती शिवाजी महाराज यांच्या हस्ते करण्यात आले. त्यामुळे गावात लवकरच छत्रपती शिवाजी महाराजांचा पुतळा उभारण्याचा मार्ग मोकळा झाला आहे.

धार्मिक कार्यासाठी ग्रामस्थांनी एकत्र येत ११ लाखांच्या संकल्पापेक्षा दुप्पट म्हणजेच २१ लाख रुपयांची देणगी जमा केली, तर दुसरीकडे गावात छत्रपती शिवाजी महाराजांचा पुतळा उभारण्यासाठी उद्योगपती दत्तात्रय मारुती मोरे यांनी स्वखर्चाने पुढाकार घेतला आहे. अशी माहिती सामाजिक कार्यकर्ते सागर (दादा) मराठा गवसणे यांनी दिली. या दोन्ही उपक्रमांमधून पिंपळगाव उंडा ग्रामस्थांची सामाजिक, धार्मिक आणि ऐतिहासिक वारशाप्रती असलेली बांधिलकी अधोरेखित होत आहे.

यावेळी युवा उद्योजक सागर दादा मराठा गवसने, दत्ता शेठ मोरे (उद्योजक) मा. सरपंच, खंडु शिंदे, सुभाष ढगे (मेजर), रमेश ढगे, स्वप्नील मोरे, संजय ढगे (मा. सरपंच), बळिराम गव्हाणे (चेअरमन), सचिष ढगे (चेअरमन), हनुमंत पवार, अमोल जाधव, हनुमंत गव्हाणे, नामदेव गव्हाणे, मल्हारी पवार (प्रगतशिल शेतकरी), दत्तात्रय गवसणे, गणेश गवसने, विकास गव्हाणे, आप्पा ढगे, गणेश ढगे, अंकुश भालेराव (अध्यक्ष RPI) यांच्या सह ग्रामस्थ मोठ्या संख्येने उपस्थित होते.