Nashik : नाशिक जिल्ह्यातील सिन्नर तालुक्यावर शोककळा पसरवणारी अत्यंत दुर्दैवी घटना समोर आली आहे. सिन्नर तालुक्यातील सोनांबे गावचे सुपुत्र आणि भारतीय सैन्याच्या ४११ पॅरा युनिटमध्ये कार्यरत असलेले पॅरा कमांडो शाकिब पिरामद पठाण (वय ३२) यांचे आग्रा येथे कर्तव्य बजावत असताना अपघाती निधन झाले.

या घटनेला जिल्हाधिकारी कार्यालयाकडूनही दुजोरा देण्यात आला आहे. मिळालेल्या माहितीनुसार, आग्रा येथील सैन्य दलाच्या निवास परिसरात काम सुरू असताना शाकिब पठाण यांना अचानक विजेचा तीव्र धक्का बसला. या अपघातात त्यांचा जागीच मृत्यू झाला. देशसेवा करत असतानाच एका शूर जवानाचा झालेला मृत्यू सिन्नर तालुक्यासह संपूर्ण परिसरासाठी मोठा धक्का मानला जात आहे.

विशेष म्हणजे, शाकिब पठाण हे अवघ्या पंधरा दिवसांपूर्वीच सुट्टी संपवून पुन्हा कर्तव्यावर रुजू झाले होते. सुट्टीवरून परतल्यानंतर काही दिवसांतच नियतीने त्यांच्यावर घाला घातल्याने कुटुंबीयांसह गावकऱ्यांवर दुःखाचा डोंगर कोसळला आहे.

हेही वाचा : India Bangladesh: बांगलादेशाची मोठी चूक की जाणीवपूर्वक खेळी? ; काश्मीरला दाखवला पाकचा भाग, भारताचा कडक आक्षेप

शाकिब पठाण यांचे दहावीपर्यंतचे शिक्षण सोनांबे येथील जनता विद्यालयात, तर बारावीचे शिक्षण सिन्नर महाविद्यालयात झाले. लहानपणापासूनच सैन्यात भरती होऊन देशसेवा करण्याचे स्वप्न त्यांनी उराशी बाळगले होते. हे स्वप्न साकार करण्यासाठी त्यांनी गावातील पर्सनल करिअर अकॅडमीमध्ये कठोर प्रशिक्षण घेतले आणि आपल्या जिद्द व मेहनतीच्या जोरावर भारतीय सैन्यात स्थान मिळवले.

शासकीय आणि लष्करी सोपस्कार पूर्ण झाल्यानंतर त्यांचे पार्थिव विशेष विमान आणि वाहनाद्वारे सोनांबे येथे आणण्यात येणार आहे. त्यांच्यावर मुस्लिम धर्मीय परंपरेनुसार तसेच लष्करी आणि शासकीय इतमामात अंत्यसंस्कार करण्यात येणार आहेत. शाकिब पठाण यांच्या पश्चात आई-वडील, पत्नी, मुलगा साजन आणि दोन भाऊ असा परिवार आहे. त्यांच्या अकाली निधनामुळे संपूर्ण सिन्नर तालुक्यात हळहळ व्यक्त होत असून, एका धाडसी जवानाला नागरिकांकडून भावपूर्ण श्रद्धांजली अर्पण केली जात आहे.

हेही वाचा : Missing Link: “मिसिंग लिंकवर दरड कोसळली त्याला नेहरूच जबाबदार”; मनसे नेत्याचा फडणविसांना खोचक टोला