मुंबई : गणेशोत्सवाच्या सांगतेनिमित्त मुंबईत भक्ती आणि उत्साहाचे वातावरण पाहायला मिळत आहे. मुंबईच्या राजाची अर्थात गणेश गल्लीच्या राजाची भव्य विसर्जन मिरवणुकीला मोठ्या उत्साहात सुरूवात झाली आहे.

‘गणपती बाप्पा मोरया, पुढच्या वर्षी लवकर या’च्या जयघोषाने परिसर दुमदुमून गेला असून, मिरवणुकीत मोठ्या संख्येने तरुण सहभागी झाले आहेत. ठिकठिकाणी गुलालाची उधळण आणि ढोल-ताशांचा गजर सुरू आहे.

यंदा मुंबईच्या राजाचे ९९ वे वर्ष असून, गणरायाची तब्बल २२ फूट उंच भव्य मूर्ती साकारण्यात आली आहे. भरतनाट्यममधील कटकमुख मुद्रेची हातमुद्रा असलेली ही मूर्ती गुलाबी फुलावर एका पायावर उभी असल्याने तिचे रूप विशेष आकर्षण ठरले. मूर्तीचे भव्य आणि देखणे स्वरूप पाहण्यासाठी भाविकांची मोठी गर्दी झाली आहे.

विसर्जन मिरवणुकीत ढोल-ताशांच्या तालावर तरुणाई थिरकताना दिसली. त्यासोबत लेझीमचे खेळ आणि गुलालाची उधळण यामुळे मिरवणुकीत उत्साहाचे वातावरण निर्माण झाले. सकाळी महाआरती झाल्यानंतर मुंबईच्या राजाची शाही मिरवणूक वाजत-गाजत गिरगाव चौपाटीच्या दिशेने रवाना झाली.

अत्याधुनिक बार्ज जहाजाच्या माध्यमातून थेट खोल समुद्रात होणार विसर्जन

यंदा प्रथमच मुंबईच्या राजाच्या २२ फूट उंच मूर्तीचे गिरगाव चौपाटीवरून अत्याधुनिक बार्ज जहाजाच्या माध्यमातून थेट खोल समुद्रात विसर्जन करण्यात येणार आहे. या पार्श्वभूमीवर प्रशासनाकडून विशेष नियोजन करण्यात आले आहे.

दरम्यान, मिरवणुकीच्या मार्गावर पोलीस प्रशासन आणि महापालिकेकडून चोख बंदोबस्त ठेवण्यात आला आहे. बाप्पाला निरोप देताना भाविकांच्या चेहऱ्यावर उत्साहासोबतच पुढील वर्षी पुन्हा बाप्पाच्या आगमनाची आस दिसून येत आहे. श्रद्धा, आनंद आणि भावनेने भरलेला हा निरोप सोहळा मुंबईकरांसाठी विशेष ठरत आहे.

Kesariwada Ganpati : मानाचा पाचवा केसरीवाडा गणपती मिरवणुकीला सुरुवात ; “मराठवाड्यातील दुष्काळग्रस्त शेतकऱ्यांचा संदेश”