पालघर: ऑर्थर रोड तुरुंगातील स्वयंपाकीच्या माध्यमातून एका बॅरेकमधील 72 कैद्यांना करोनाचा संसर्ग झाल्याचे समोर आले आहे. या कैद्यांना मुंबई महापालिकेच्या माध्यमातून तुरुंगाबाहेर क्वारंटाइन करण्यासाठी स्वतंत्र कक्ष उभारण्यात येईल, असे गृहमंत्री अनिल देशमुख यांनी दिली.

पालघर जिल्ह्यातील गडचिंचले येथे झालेल्या हत्याकांडाच्या ठिकाणाची पाहणी करण्यासाठी गृहमंत्र्यांनी आज सकाळी घटनास्थळी भेट दिली. त्यानंतर पालघर जिल्हाधिकारी कार्यालयात करोनाविषयी तसेच इतर घटनांबाबत आढावा घेतल्यानंतर त्यांनी पत्रकारांना संबोधित केले.
तुरुंगात असलेल्या कैद्यांना करोनाचा संसर्ग होऊ नये म्हणून टाळेबंदीच्या काळात आठ तुरुंगामध्ये टाळेबंदीची विशेष व्यवस्था करण्यात आली होती. अशा तुरुंगामध्ये या काळात कुणालाही आत-बाहेर जाण्याची मुभा देण्यात आली नव्हती. तरी देखील एका स्वयंपाकीला झालेल्या करोना संसर्गामुळे आर्थर रोडमधील कैद्यांना आजारांने ग्रासल्याचे त्यांनी सांगितले.

राज्यातील विविध ठिकाणी असलेल्या तुरूंगामध्ये क्षमतेपेक्षा अधिक कैद्यांची संख्या असल्याने सुनावणी दरम्यान (अंडरट्रायल)च्या स्थितीत असलेल्या सुमारे साडेपाच हजार कैद्यांना यापूर्वी जामिनावर सोडून देण्यात आले आहे. सात वर्षांपेक्षा कमी शिक्षा असलेल्या तसेच गंभीर गुन्ह्यांमध्ये आरोपी नसलेल्या इतर सुमारे साडेपाच हजार कैद्यांना पॅरोलवर सोडून देण्याचे राज्य सरकारने निर्णय घेतला असून या निर्णयामुळे राज्यातील विविध तुरुंगातील अकरा हजार कैदी संख्या कमी होईल, असेही देशमुख यांनी सांगितले.

---

531 पोलीस करोनाबाधित

राज्यात करोनाविरुद्ध फ्रण्ट लाईनवर लढणाऱ्या योद्‌ध्यांमध्येच संसर्ग वाढल्याने चिंताजनक बाब समोर आली आहे. राज्यातील तब्बल 531 पोलिसांना करोनाची लागण झाली आहे. यामध्ये 51 अधिकारी आणि 480 कर्मचाऱ्यांचा समावेश आहे. तर कर्तव्य बजावणाऱ्या पाच पोलिसांनी प्राण गमावले आहेत.
सद्यस्थितीत 43 अधिकारी आणि 444 कर्मचारी करोनासंक्रमित आहेत. तर आतापर्यंत 39 जण बरे झाले असून त्यांना डिस्चार्ज देण्यात आला आहे. यामध्ये आठ अधिकारी आणि कर्मचारी आहेत. तर मुंबईतील तीन तसेच पुणे आणि सोलापूरमधील प्रत्येकी एका पोलीस कर्मचाऱ्याचा करोनामुळे मृत्यू झाला आहे. दरम्यान, औरंगाबादमध्ये आढळलेल्या करोनाबाधित पोलिसाच्या कुटुंबियांची तपासणी केली असता 5 जण करोना पॉझिटिव्ह आढळले आहेत. यात त्यांचा मुलगा हा नुकातच दिल्लीवरून परतला होता.