71st National Film Awards: ७१ व्या राष्ट्रीय चित्रपट पुरस्कारांची घोषणा करण्यात आली असून या वेळी मराठी चित्रपटांचा लक्षणीय दबदबा पाहायला मिळाला. २०२३ मध्ये प्रदर्शित झालेल्या ‘श्यामची आई’ या चित्रपटाला सर्वोत्कृष्ट मराठी चित्रपट पुरस्काराने गौरवण्यात आले आहे. हा चित्रपट दिग्दर्शक सुजय डहाके यांचा असून यामध्ये ओम भुतकरने साने गुरुजींची भूमिका साकारली आहे. त्यांच्या अभिनयासह गौरी देशपांडे, शर्व गाडगीळ, संदीप पाठक, सारंग साठ्ये, ज्योती चांदेकर, उर्मिला जगताप, अक्षया गुरव, दिशा काटकर, मयूर मोरे, गंधार जोशी, अनिकेत सागवेकर यांची देखील महत्त्वपूर्ण भूमिका आहे.

यंदा सर्वात मोठा आश्चर्याचा क्षण ठरला तो म्हणजे शाहरुख खानला त्याच्या कारकिर्दीतील पहिल्यावहिल्या राष्ट्रीय पुरस्काराने गौरवण्यात आले. ‘जवान’ चित्रपटासाठी त्याला सर्वोत्कृष्ट अभिनेता पुरस्कार मिळाला आहे. विक्रांत मेसीलाही ‘१२th फेल’ या चित्रपटासाठी समान सन्मान मिळाला.

त्याचबरोबर ‘१२th फेल’ या चित्रपटाने सर्वोत्कृष्ट फिचर फिल्म पुरस्कार पटकावला आहे. राणी मुखर्जीला ‘मिसेस चटर्जी वर्सेस नॉर्वे’ मधील दमदार भूमिकेसाठी सर्वोत्कृष्ट अभिनेत्री पुरस्काराने सन्मानित करण्यात आले.

महत्त्वाचे पुरस्कार विजेते:

सर्वोत्कृष्ट मराठी सिनेमा: श्यामची आई

सर्वोत्कृष्ट अभिनेता: शाहरुख खान (जवान), विक्रांत मेसी (१२th फेल)

सर्वोत्कृष्ट अभिनेत्री: राणी मुखर्जी (मिसेस चटर्जी वर्सेस नॉर्वे)

सर्वोत्कृष्ट फिचर फिल्म: १२th फेल

सर्वोत्कृष्ट बालकलाकार (मराठी): कबीर कंढरे (जिप्सी), त्रिशा ठोसर, श्रीनिवास पोकले, भार्गव

सर्वोत्कृष्ट लहान मुलांचा सिनेमा: नाळ २

सर्वोत्कृष्ट डेब्यू फिल्म दिग्दर्शक: आशीष बेंडे (आत्मपॅम्फलेट)

सर्वोत्कृष्ट अॅक्शन सिनेमा: हनूमान

सर्वोत्कृष्ट कोरिओग्राफी: वैभवी मर्चंट (रॉकी और रानी की प्रेम कहाणी)

सर्वोत्कृष्ट संगीत दिग्दर्शक: हर्षवर्धन रामेश्वर (अॅनिमल)

सर्वोत्कृष्ट सिनेमॅटोग्राफी: प्रसन्नता मोहपात्रा (द केरला स्टोरी)

राष्ट्रीय पुरस्कारांमधून यंदाही विविध भाषांतील उत्कृष्ट चित्रपटांचा गौरव करण्यात आला आहे. हिंदीमधून ‘कठल’, तमिळमधून ‘पार्किंग’, तेलुगूमधून ‘भागावान्थ केसरी’, गुजरातीसाठी ‘वश’, बंगालीसाठी ‘डीप फ्रीजर’, तर पंजाबी चित्रपट ‘गॉडडे गॉडडे चा’ ला सन्मान मिळाला आहे.

सर्वच विजेत्यांचे सिनेसृष्टीतून अभिनंदन होत असून या पुरस्कारांमुळे अनेक नवोदित कलावंतांनाही नवी ओळख आणि संधी मिळाली आहे.