Bonded Staff Nurse : सार्वजनिक आरोग्य विभागातील बंधपत्रित (Bonded Staff Nurse) अधिपरिचारिकांच्या सेवा नियमित करण्यासाठी लवकरच धोरणात्मक निर्णय घेतला जाणार आहे. सुमारे ७०० पात्र अधिपरिचारिकांना सेवेत सामावून घेण्यास सामान्य प्रशासन विभागाने मान्यता दिली आहे. विधि व न्याय विभागाच्या शिफारशीनंतर हा प्रस्ताव वित्त विभागाकडे पाठवण्यात आला आहे, अशी माहिती सार्वजनिक आरोग्य व कुटुंब कल्याण राज्यमंत्री मेघना साकोरे-बोर्डीकर यांनी दिली.

बंधपत्रित अधिपरिचारिकांच्या सेवा नियमित करण्याबाबत राज्यमंत्री साकोरे-बोर्डीकर यांच्या अध्यक्षतेखाली निर्मल भवन येथे आढावा बैठक झाली. या बैठकीत त्या बोलत होत्या. १५ एप्रिल २०१५ रोजीच्या अधिसूचनेनुसार सेवा प्रवेश नियमांतर्गत बंधपत्रावर अधिपरिचारिका म्हणून नियुक्त झालेल्या आणि अद्याप सेवानिवृत्त न झालेल्या अधिपरिचारिकांच्या सेवा नियमित करण्याबाबत शासन सकारात्मक आहे. पात्र अधिपरिचारिकांना लवकर न्याय मिळावा यासाठी आवश्यक कार्यवाही सुरू असून, त्यासाठी धोरणात्मक निर्णय घेतला जाईल, असे त्यांनी स्पष्ट केले.

राज्यात अधिपरिचारिका संवर्गातील एकूण ९,६९९ पदे मंजूर आहेत. त्यापैकी ७,७१४ पदे भरली असून १,९८५ पदे अद्याप रिक्त आहेत.

या बैठकीला आरोग्य आयुक्त (शहरी) डॉ. सुनील भोकरे, सार्वजनिक आरोग्य विभागाच्या उपसचिव डॉ. उर्मिला जोशी, अवर सचिव डॉ. श्वेता सावदेकर, आरोग्य आयुक्तालयाचे संचालक डॉ. विजय कंदेवाड आणि उपसंचालक डॉ. नीलिमा सोनावणे उपस्थित होते. माजी आमदार संजय केणेकर यांनी दूरदृश्य प्रणालीद्वारे सहभाग घेतला.