जुन्नर – जिल्ह्यातील महत्त्वाच्या चाकण (ता. खेड) नगर परिषदेसाठी 65 कोटी तर जुन्नर नगरपरिषदेसाठी 14 कोटींच्या पाणी योजनांना राज्याचे नगरविकास व बांधकाम मंत्री एकनाथ शिंदे यांनी मंजुरी दिल्याची माहिती शिवसेना उपनेते, माजी खासदार शिवाजीराव आढळराव पाटील यांनी दिली.

आढळराव पाटील म्हणाले की, चाकण आणि जुन्नर या दोन महत्त्वपूर्ण शहरांची वाढती लोकसंख्या व पाण्याची गरज लक्षात घेऊन गेली तीन-चार वर्षांपासून या ठिकाणी पाणी योजनांना मंजुरी मिळावी याकरिता मंत्री एकनाथ शिंदे यांच्याकडे तसेच मंत्रालयातील नगरविकास खात्याचे वरिष्ठ अधिकारी, महाराष्ट्र जीवन प्राधिकरण यांच्याकडे पाठपुरावा सुरू होता.

चाकण शहराला 61 हजार लोकसंख्येचा विचार करून प्रति माणसी दररोज 135 लिटर प्रमाणे पाणीपुरवठा होऊ शकेल यादृष्टीने 65.14 कोटींचे अंदाजपत्रक करण्यात आले. भामा आसखेड धरणातून 2.186 दशलक्ष घनमीटर पाणी उचलण्यासाठी एप्रिल 2019 मध्ये परवानगी घेण्यात आली होती. या कामासाठी स्व. माजी आमदार सुरेश गोरे आणि आढळराव पाटील यांनी सातत्याने पाठपुरावा केला होता.

जुन्नर शहरासाठी जलाशयातून बंदिस्त पाइपलाइनद्वारे पाणीपुरवठा योजना राबविणे याकामी सुमारे 14 कोटी रकमेचा प्रस्ताव तयार करून मंत्रालयाकडे पाठविण्यात आला. माणिकडोह जलाशयातून पाणी उचलण्याकरिता मंजुरी घेण्यात आली.

दिलेला शब्द पूर्ण होणार!
चाकण आणि जुन्नर नगर परिषदेच्या पाणीपुरवठा योजनांच्या कामांना तांत्रिक मंजुरी मिळाल्यानंतर राज्याचे नगरविकास बांधकाम मंत्री एकनाथ शिंदे यांच्या दालनात दोन्ही नगर परिषदेच्या पदाधिकाऱ्यांसमवेत भेट घेऊन अंतिम मंजुरीसाठी पाठपुरावा सुरू होता. बुधवारी (दि. 3) याबाबत मंत्रालयामध्ये नगर विकास मंत्री एकनाथ शिंदे आणि वरिष्ठ अधिकाऱ्यांसमवेत बैठक पार पडली. त्यावेळी दोन्ही नगर परिषदेतील महत्त्वपूर्ण पाणी योजनांना मंजुरी मिळाली आहे. स्व. आमदार सुरेश गोरे आणि आढळराव पाटील यांनी निवडणूक काळामध्ये चाकणकरांना दिलेला शब्द पूर्ण होण्याच्या मार्गावर आहे.