इस्लामाबाद : पाकिस्तानचे पंतप्रधान शहबाज शरीफ यांनी भारताला थेट युद्धाची धमकी देत सिंधू जल करार तोडल्यास गंभीर परिणाम भोगावे लागतील, असा इशारा दिला आहे. गेल्या ४८ तासांत पाकिस्तानच्या तीन वरिष्ठ नेत्यांनी भारताविरोधात आक्रमक वक्तव्ये करत तणाव वाढवला आहे. यामध्ये पाकिस्तानचे लष्करप्रमुख आसिम मुनीर, पंतप्रधान शहबाज शरीफ आणि माजी परराष्ट्रमंत्री बिलावल भुट्टो यांचा समावेश आहे. भारताने २४ एप्रिल २०२५ रोजी ६५ वर्षे जुना सिंधू जल करार स्थगित केल्याच्या पार्श्वभूमीवर ही धमकी देण्यात आली आहे.

#BREAKING: Pakistan Prime Minister Shehbaz Sharif warns India of serious consequences if India stops Indus Water Treaty. Says, he won’t let India take even a drop of Pakistan’s share of water. This is 4th threat from Pak in 48 hours after Asim Munir, Bilawal Bhutto, Khawaja Asif. pic.twitter.com/ER1uojwHoi

— Aditya Raj Kaul (@AdityaRajKaul) August 12, 2025

शहबाज शरीफ यांचा इशारा –
मंगळवारी इस्लामाबाद येथील एका कार्यक्रमात बोलताना शहबाज शरीफ म्हणाले, “भारताने जर पाकिस्तानला मिळणाऱ्या पाण्याचा एक थेंबही रोखला, तर आम्ही असा धडा शिकवू की, तो तुम्ही आयुष्यभर विसरणार नाही.” त्यांनी पुढे सांगितले की, भारताने पाणी रोखण्याचा प्रयत्न केल्यास तो सिंधू जल कराराचा भंग ठरेल आणि त्याला “निर्णायक” प्रत्युत्तर दिले जाईल. “पाणी ही पाकिस्तानची जीवनरेखा आहे. आमच्या हक्कांशी कोणतीही तडजोड केली जाणार नाही,” असेही त्यांनी म्हणाले.

⚡ BREAKING: Former Pakistani Foreign Minister Bilawal Bhutto threatens war against India if India continues to put Indus Water Treaty in abeyance & constructs a dam. pic.twitter.com/DW6f3b0AJA

— OSINT Updates (@OsintUpdates) August 11, 2025

बिलावल भुट्टो यांची युद्धाची भाषा –
शहबाज शरीफ यांच्यापूर्वी, सोमवारी पाकिस्तानचे माजी परराष्ट्रमंत्री आणि पीपल्स पार्टीचे नेते बिलावल भुट्टो यांनीही भारताला युद्धाची धमकी दिली होती. सिंध प्रांतातील एका कार्यक्रमात बोलताना ते म्हणाले, “भारताने जर सिंधू जल करार निलंबित ठेवला, तर आमच्याकडे युद्धाशिवाय दुसरा पर्याय उरणार नाही.” त्यांनी दावा केला की, “पाकिस्तानचे लोक सहा नद्यांचे पाणी परत मिळवण्यासाठी लढण्यास सक्षम आहेत.” बिलावल यांनी पंतप्रधान नरेंद्र मोदी यांच्या धोरणांवर टीका करताना भारताच्या “आक्रमक धोरणांना” एकजुटीने प्रत्युत्तर देण्याचे आवाहन केले.

४८ तासांत तीन नेत्यांचे आक्रमक वक्तव्य –
सिंधू जल कराराच्या मुद्द्यावरून गेल्या ४८ तासांत पाकिस्तानच्या तीन वरिष्ठ नेत्यांनी भारताला धमकी दिली आहे. यामध्ये लष्करप्रमुख आसिम मुनीर यांचाही समावेश आहे. जर भारत सिंधु नदीचे पाण्यावर बांध बांधत असेल तर पाकिस्तान तो बांध 10 मिसाईलने उडवून देईल असे मुनिर म्हणाला. या सलग धमक्यांमुळे भारत-पाकिस्तान संबंधांमधील तणाव आणखी वाढला आहे. भारताने पहलगाम येथे २२ एप्रिल २०२५ रोजी झालेल्या दहशतवादी हल्ल्याच्या पार्श्वभूमीवर २४ एप्रिल रोजी हा करार स्थगित केला होता. या हल्ल्यात २६ जणांचा मृत्यू झाला होता.

सिंधू जल करार म्हणजे काय?
सिंधू नदी प्रणालीत एकूण सहा नद्या आहेत: सिंधू, झेलम, चिनाब, रावी, ब्यास आणि सतलज. या नद्यांचा परिसर सुमारे ११.२ लाख चौरस किलोमीटर क्षेत्रात पसरलेला आहे. यापैकी ४७% भूभाग पाकिस्तानात, ३९% भारतात, ८% चीनमध्ये आणि ६% अफगानिस्तानात आहे. या परिसरात सुमारे ३० कोटी लोक राहतात.

भारत-पाकिस्तान फाळणीनंतर १९४७ पासूनच पंजाब (भारत) आणि सिंध (पाकिस्तान) प्रांतांदरम्यान पाण्याच्या वाटपावरून वाद सुरू झाला होता. १९४७ मध्ये भारत आणि पाकिस्तानच्या अभियंत्यांदरम्यान ‘स्टँडस्टिल करार’ झाला, ज्याअंतर्गत पाकिस्तानला दोन मुख्य कालव्याद्वारे पाणी मिळत होते. हा करार ३१ मार्च १९४८ पर्यंत लागू होता. मात्र, १ एप्रिल १९४८ रोजी करार संपल्यानंतर भारताने या कालव्यांचे पाणी रोखले, ज्यामुळे पाकिस्तानच्या पंजाब प्रांतातील १७ लाख एकर शेतीचे नुकसान झाले. त्यानंतर पुन्हा झालेल्या करारानुसार भारताने पाणी सोडण्यास सहमती दर्शवली.

१९५१ ते १९६० या कालावधीत जागतिक बँकेच्या मध्यस्थीने भारत आणि पाकिस्तान यांच्यात पाणीवाटपावर चर्चा झाली. अखेरीस १९ स सप्टेंबर १९६० रोजी कराची येथे भारताचे तत्कालीन पंतप्रधान जवाहरलाल नेहरू आणि पाकिस्तानचे राष्ट्राध्यक्ष अयूब खान यांनी सिंधू जल करारावर स्वाक्षरी केली.

भारताने करार का स्थगित केला?
पहलगाम येथील दहशतवादी हल्ल्याच्या दुसऱ्या दिवशी, म्हणजेच २४ एप्रिल २०२५ रोजी भारताने हा ६५ वर्षे जुना करार स्थगित केला. या हल्ल्यात २६ जणांचा मृत्यू झाला होता, ज्यामुळे भारताने कठोर पाऊल उचलत हा निर्णय घेतला.

पाकिस्तानच्या धमक्यांचा भारतावर परिणाम?
पाकिस्तानच्या सलग धमक्यांमुळे दोन्ही देशांमधील तणाव वाढला आहे. भारताने अद्याप यावर अधिकृत प्रतिक्रिया दिलेली नाही. मात्र, सिंधू जल करार हा दोन्ही देशांमधील नाजूक मुद्दा राहिला आहे. यापूर्वीही भारताने दहशतवादी हल्ल्यांनंतर या कराराचा फेरविचार करण्याचे संकेत दिले होते. पाकिस्तानच्या या आक्रमक वक्तव्यांमुळे आंतरराष्ट्रीय समुदायाचेही लक्ष या वादाकडे लागले आहे.

दरम्यान, सध्या भारत आणि पाकिस्तान यांच्यातील संबंध तणावपूर्ण आहेत. पाकिस्तानच्या नेत्यांनी दिलेल्या धमक्यांमुळे हा वाद आणखी चिघळण्याची शक्यता आहे. जागतिक बँक आणि इतर आंतरराष्ट्रीय संस्था या प्रकरणात मध्यस्थी करतील का, हे पाहणे महत्त्वाचे ठरेल. भारताने करार स्थगित केल्याने पाकिस्तानच्या शेती आणि पाणीपुरवठ्यावर मोठा परिणाम होऊ शकतो, ज्यामुळे हा मुद्दा आणखी संवेदनशील बनला आहे.