indore | transgender community : इंदूरच्या नंदलालपुरा परिसरात बुधवारी रात्री एक धक्कादायक आणि हृदयद्रावक घटना घडली. किन्नर समाजातील २४ जणांनी फिनाइल प्राशन करून सामूहिक आत्महत्येचा प्रयत्न केला. या घटनेने संपूर्ण शहरात खळबळ उडाली आहे. मिळालेल्या माहितीनुसार, काही किन्नर खोलीत बंद अवस्थेत तडफडत असल्याचे साथीदारांनी पाहिले आणि तत्काळ पोलिसांना कळवले. पोलिसांनी दरवाजा तोडून सर्वांना बाहेर काढले आणि तातडीने रुग्णालयात दाखल केले. सध्या सर्वांवर रुग्णालयात उपचार सुरू आहे. रात्री उशिरा किन्नर समाजाचा संताप फुटला : घटनेनंतर शेकडो किन्नर रस्त्यावर उतरले आणि जवाहर मार्गावर तब्बल दीड तासांहून अधिक काळ चक्काजाम केला. त्यानंतर ते पंढरीनाथ पोलिस ठाण्यात पोहोचले आणि तीव्र आंदोलन केले. किन्नर समाजाचा आरोप आहे की, पोलिस गेल्या दहा महिन्यांपासून त्यांच्या तक्रारी दडपवत आहेत आणि सपना हाजी, तिचा प्रियकर राजा हाशमी, साथी विजय, वकील पंकज आणि अक्षय यांच्या विरोधात अजूनपर्यंत कोणतीही ठोस कारवाई झालेली नाही. किन्नरांनी इशारा दिला की, जर तत्काळ आरोपींना अटक झाली नाही तर ते आत्मदहन करतील. स्वतःला पेटवण्याचा प्रयत्न : घटनेनंतर रात्री उशिरा १५० हून अधिक किन्नरांनी रुग्णालयाबाहेर चार तासांपर्यंत गोंधळ घातला. काहींनी तर पेट्रोल ओतून स्वतःला आग लावण्याचा प्रयत्न केला. पोलिस आणि प्रशासनातील अधिकाऱ्यांनी हात जोडून त्यांना समजवण्याचा प्रयत्न केला, त्यानंतरच परिस्थिती नियंत्रणात आली. दरम्यान, पोलिसांनी सपना हाजी, राजा हाशमी, पंकज आणि अक्षय यांच्याविरुद्ध गुन्हा दाखल करून तपास सुरू केला आहे. अधिकाऱ्यांनी किन्नर गुरूंना आश्वासन दिले की, कारवाई आजच केली जाईल. मात्र, या आश्वासनावर किन्नर समाजाने तीव्र नाराजी व्यक्त केली. महामंडलेश्वरांचा आरोप : नंदलालपुरा डेऱ्याच्या महामंडलेश्वर मंगला गोरी नंदगिरी यांनी गंभीर आरोप करत सांगितले की, सपना हाजी उर्फ गुरु हिने डेऱ्यात गटबाजी निर्माण करून धर्म आणि संपत्तीच्या राजकारणाला खतपाणी घातले. सपनाने डेऱ्यातील सोने, चांदी आणि रोकड आपल्या प्रियकर राजा हाशमी आणि इतर काही जणांना दिल्यामुळे किन्नर समाजात तीव्र असंतोष पसरला. मे महिन्यात, या गैरव्यवहारांची माहिती मिळाल्यानंतर सपना हाजीला गुरु पदावरून हटवण्यात आले. त्यानंतर डेऱ्यातील ११ किन्नर नवीन महामंडलेश्वरांच्या संरक्षणाखाली कार्य करू लागले. मात्र, सपना आणि तिचा गट इतर किन्नरांना धमकावू आणि छळू लागला, असा आरोपही मंगला गोरी यांनी केला. सपना हाजीवर याआधीही गुन्हे दाखल : चौकशीत समोर आले की, सपना हाजीवर याआधीही खरगोन, लाडी, रिंगनोदसह अनेक जिल्ह्यांत प्रकरणे दाखल आहेत. तिने विविध डेऱ्यांतील किन्नरांना फसवून आपला धार्मिक प्रभाव वाढवण्याचा प्रयत्न केल्याचा दावा करण्यात आला आहे. महामंडलेश्वर मंगला गोरी नंदगिरी म्हणाल्या, “सपना गुरुच्या वर्तनामुळे अनेक किन्नरांनी डेरे सोडले आणि नवीन गटाच्या आश्रयाला गेले. तिच्या चुकीच्या कृत्यांमुळे समाजात भीती, गटबाजी आणि असंतोष वाढला आहे.” पोलिसांचा तपास सुरु : या संपूर्ण घटनेनंतर इंदूर शहरात किन्नर समाजात प्रचंड असंतोष आहे. पोलिसांनी प्रकरणाचा सखोल तपास सुरू केला असून, संबंधित आरोपींविरुद्ध कडक कारवाई होणार असल्याचे संकेत दिले आहेत.
