पिंपरी –  चिखली परिसरातील वीजपुरवठा यंत्रणा अधिक सुरक्षित आणि आधुनिक करण्याच्या दृष्टीने महत्त्वाचे पाऊल उचलण्यात आले आहे. चिखली फीडरवरील २२ केव्ही उच्चदाबाची ओव्हरहेड वीजवाहिनी भूमिगत केबलमध्ये रूपांतरित करण्याच्या कामाला महावितरण मंडळाकडून प्रशासकीय मंजुरी देण्यात आली आहे. या कामासाठी नगरसेवक निलेश नेवाळे सातत्याने पाठपुरावा करत होते. अखेर त्यांच्या पाठपुराव्याला यश आले असून महावितरण मंडळाने हा महत्वाचा निर्णय घेतला आहे.

आकुर्डी उपविभागांतर्गत चिखली सेक्शनमधील २२ केव्ही चिखली फीडरची ओव्हरहेड वीजवाहिनी भूमिगत करण्यासाठी सुधारित तांत्रिक अंदाज सादर करण्यात आला होता. त्याला सक्षम प्राधिकरणाने प्रशासकीय मान्यता दिली आहे.

या कामामध्ये २२ केव्ही क्षमतेची ३ कोअर, ३०० चौरस मिलिमीटर केबल टाकण्यात येणार आहे. यासाठी दोन हजार मीटर म्हणजेच दोन किलोमीटर केबल प्रस्तावित आहे. याशिवाय, आधुनिक तंत्रज्ञानावर आधारित मोटराइज्ड आणि एससीएडीए प्रणालीशी सुसंगत २२ केव्ही आरएमयू (रिंग मेन युनिट) बसविण्यात येणार आहे.

तसेच केबल जोडणीसाठी १२ हीट श्रिंक आउटडोअर टर्मिनेशन जॉइंट किटचाही समावेश आहे. या कामामुळे संबंधित वीजवाहिनी भूमिगत करण्यासाठी आवश्यक तांत्रिक पायाभूत सुविधा उभारण्यात येणार आहेत.

भूमिगत केबल टाकताना रस्ते खोदावे लागणार आहे. हे रस्ते पूर्ववत करण्यासाठी १३ लाख ५८ हजार ४७२ रुपयांचा खर्च अंदाजपत्रकात नमूद करण्यात आला आहे. त्यामुळे केबल टाकण्यासोबतच रस्त्यांची दुरुस्ती करण्याचे नियोजनही समाविष्ट आहे.

‘खांबांवरून वीजवाहिन्या असल्याने अनेकवेळा अपघाताच्या घटना घडल्या आहेत. त्यामुळे या वीजवाहिन्या भूमिगत करण्यासाठी सातत्याने महावितरणकडे पाठपुरावा सुरू होता. अखेर त्याला यश आले असून आता भूमिगत वीजवाहिनी टाकण्यात येणार आहे. यामुळे अपघाताचा मोठा धोका टळला आहे.’ – निलेश नेवाळे, नगरसेवक.

YCM Hospital: वायसीएमचे डॉक्टर तर्राट…? शवविच्छेदन विभागात ‘दारूचा अड्डा’ -टेबलावर मद्याच्या बाटल्या