बारामती : भिगवण रोड परिसरातील एका निवासी इमारतीत राहणाऱ्या इयत्ता अकरावी विज्ञान शाखेतील १६ वर्षीय विद्यार्थिनीने इमारतीच्या चौथ्या मजल्यावरील टेरेसवरून उडी घेतल्याची धक्कादायक घटना शुक्रवारी (दि. ४) पहाटे घडली. या घटनेत गंभीर जखमी झालेल्या विद्यार्थिनीचा उपचारादरम्यान मृत्यू झाला. अभ्यास व परीक्षेचा ताण असल्याची प्राथमिक माहिती तिच्या पालकांनी पोलिसांना दिली असून, घटनेमागील नेमके कारण शोधण्यासाठी बारामती शहर पोलिसांकडून सर्व बाजूंनी सखोल चौकशी सुरू आहे.

सदर विद्यार्थिनी बारामतीतील एका महाविद्यालयात इयत्ता अकरावी विज्ञान शाखेत शिक्षण घेत होती. सध्या तिच्या परीक्षा सुरू होत्या. मागील काही दिवसांपासून ती अभ्यास व परीक्षेचा ताण घेत असल्याचे तसेच अभ्यास होत नसल्याबाबत आणि परीक्षेचे टेन्शन येत असल्याचे ती आई-वडिलांकडे बोलत असल्याची माहिती पालकांनी प्राथमिक चौकशीत दिली आहे.

पोलिसांनी दिलेल्या माहितीनुसार, गुरुवारी रात्री संबंधित विद्यार्थिनी सुमारे साडेबारा वाजेपर्यंत अभ्यास करीत होती. त्यानंतर टेरेसवर जाऊन येत असल्याचे सांगून ती चौथ्या मजल्यावरील गच्चीवर गेली. बराच वेळ होऊनही ती खाली न आल्याने तिचे वडील तिला पाहण्यासाठी टेरेसवर गेले. त्यावेळी ती टेरेसच्या कड्यावर बसलेली दिसली. वडिलांनी तिला आवाज देऊन विचारणा केली असता तिने अचानक खाली उडी घेतल्याची माहिती प्राथमिक तपासात समोर आली आहे.

इमारतीच्या समोरील भागात खाली पडल्याने विद्यार्थिनी गंभीर जखमी झाली. आई-वडील आणि शेजाऱ्यांच्या मदतीने तिला तातडीने बारामती येथील वैद्यकीय महाविद्यालयात उपचारासाठी दाखल करण्यात आले. उपचार सुरू असताना काही काळ ती शुद्धीवर होती. मात्र, त्यानंतर तिची प्रकृती अधिक गंभीर झाली आणि पहाटे सुमारे पाच वाजण्याच्या सुमारास उपचारादरम्यान तिचा मृत्यू झाला.

नेमके कारण अद्याप अस्पष्ट

या प्रकरणी विद्यार्थिनीच्या आई-वडिलांनी किंवा नातेवाईकांनी सद्यस्थितीत कोणत्याही व्यक्तीविरुद्ध तक्रार अथवा संशय व्यक्त केलेला नसल्याची माहिती पोलिसांनी दिली आहे. अभ्यास व परीक्षेचा ताण असल्याची माहिती पालकांकडून प्राथमिक स्वरूपात देण्यात आली असली, तरी या घटनेमागील नेमके कारण अद्याप स्पष्ट झालेले नाही.

सदर विद्यार्थिनी यापूर्वीही घरातून निघून गेल्याची नोंद बारामती शहर पोलीस ठाण्यात करण्यात आली होती. त्या प्रकरणातील कागदपत्रे, जबाब आणि तपासात निष्पन्न झालेल्या बाबींचीही सद्य घटनेच्या अनुषंगाने पडताळणी केली जात आहे.

मोबाईल व डिजिटल माहितीचीही पडताळणी

प्राथमिक चौकशीत संबंधित विद्यार्थिनीकडे स्वतःचा वैयक्तिक मोबाईल फोन नसल्याची माहिती समोर आली आहे. ती आवश्यकतेनुसार आई-वडिलांच्या मोबाईलचा वापर करीत होती. त्यामुळे आवश्यक कायदेशीर प्रक्रिया पूर्ण करून संबंधित मोबाईलमधील घटनेशी संबंधित उपलब्ध डिजिटल माहितीचीही पडताळणी करण्यात येणार आहे.

घटनास्थळाची पाहणी, पंचनामे, उपलब्ध सीसीटीव्ही फुटेज, वैद्यकीय कागदपत्रे आणि डिजिटल माहितीची तपासणी करण्याबरोबरच पालक, नातेवाईक, मैत्रिणी, सहाध्यायी, शिक्षक आणि इतर संबंधित व्यक्तींचे जबाब घेण्यात येत आहेत. वैयक्तिक, शैक्षणिक, कौटुंबिक अथवा अन्य कोणती पार्श्वभूमी होती काय, तसेच कोणत्याही व्यक्तीकडून त्रास, दबाव किंवा अन्य कोणती बाब घडली होती काय, याचीही निष्पक्षपणे चौकशी करण्यात येत असल्याचे पोलिसांनी स्पष्ट केले.

या प्रकरणी कायदेशीर प्रक्रियेनुसार अकस्मात मृत्यूची नोंद करण्यात आली असून, पुढील तपास बारामती शहर पोलीस ठाण्याकडून सुरू आहे. अल्पवयीन विद्यार्थिनीची ओळख गोपनीय ठेवण्यात आली असून, नागरिक आणि प्रसारमाध्यमांनी तिचे नाव, छायाचित्र किंवा ओळख पटेल अशी कोणतीही वैयक्तिक माहिती प्रसिद्ध करू नये, असे आवाहन बारामती शहर पोलिसांकडून करण्यात आले आहे.